Mıllıarderlerdiń sany boıynsha Máskeý álemdegi eń alǵashqy qala - «Forbs» jýrnaly
ASTANA. 10 naýryz. QazAqparat -Álemdegi mıllıarderlerdiń kóbisi Máskeýde turady. Bıyl bul kórsetkish boıynsha Reseı astanasy Nıý-Iork jáne London qalalaryn shań qaptyryp, kósh bastap tur.
Ataqty amerıkandyq «Forbs» jýrnaly málim etkendeı, álemdegi eń baı adamdardyń tizimi boıynsha Reseı astanasynda 78 adam, Nıý-Iorkta 58 adam jáne Londonda 39 adam turady.
Degenmen «Forbs» jýrnalynyń málimetine súıensek, eń kóp mıllıarder - 425 adam AQSh-ta ómir súredi eken. Reseı bul kórsetkish boıynsha ekinshi oryndy ıelendi, bunda turatyn baqýatty adamdardyń sany 96. Jáne de Qytaı 95 adammen úshinshi orynǵa taban tiregen. Aıta keteıik, bul reıtıngke 58 el kirdi.
Atalmysh jýrnaldyń málimetine sáıkes, álemdegi eń baı adam meksıkalyq medıamagnat Karlos Slım atandy.
Álemdegi eń baı adamdardyń ekinshi qatarynda «Maıkrosoftyń» negizin salýshysy Bıll Geıts ornalasty. Ol ótken jylmen salystyrǵanda dáýletin 5 mlrd. dollarǵa kóbeıtken. Sóıtip óziniń ál-aýqatyn 61 mlrd. dollarǵa jetkizgen. 3 jyl qatarynan oljalylardyń ishinde amerıkalyq ınvestor Ýorren Baffest 44 mlrd. dollar qarajatymen «qola» júldeger atandy.
Taý-ken metallýrgııalyq «Metalloınvest» holdınginiń ıesi Alısher Ýsmanov RF-nyń eń baı azamaty. Forbstyń málimeti boıynsha, onyń dáýleti 18,1 mlrd. dollardy quraıdy (28 oryn).
Baı adamdardyń dáýleti boıynsha jasalǵan bul tizimge 104 áıel kirdi. Názik jandylardyń arasynda álemdegi eń iri bólshektep satý dúkeni «Ýoll-mart» ımperııasynyń murageri Krıstı Ýolton 7 ret eń baı áıel atanyp otyr. Ol 25,3 mlrd. dollarǵa ıe (11 oryn).
Sonymen qatar, aǵymdaǵy jyly álemdegi eń iri qurysh kompanııasynyń ıesi úndilik Lakshmı Mıttal 10,4 mlrd. dollar qarajatynan aıyryldy.
«Feısbýk» áleýmettik jelisiniń basshysy 27 jastaǵy Mark Tsýkerberg bıyl 17,5 mlrd. dollarymen 35-shi orynǵa jaıǵasty. Ótken jyly bul kórsetkish 13,5 mlrd. teńgeni quraǵan bolatyn.
2012 jyly álemdegi eń baı adamdardyń tizimi rekordtyq 1226 adamǵa jetti. «Forbs» jýrnalynyń málimeti boıynsha, olardyń jalpy dáýleti 4,6 trln. dollardy qurady. Bul ótken jylǵy kórsetkishpen salystyrǵanda 100 mıllardqa artyq.
