Mıllıarderler saıasat pen BAQ-ty baqylaýdy kúsheıtti — Oxfam
ASTANA. KAZINFORM – Álem boıynsha mıllıarderlerdiń baılyǵy 2025 jylǵa qaraı 2,5 trln dollarǵa artyp, rekordtyq 18,3 trln dollarǵa jetti, dep habarlaıdy Kazinform.
Oxfam-nyń jyl saıynǵy esebine sáıkes, ótken jyly álemde 3 myńnan astam mıllıarder bolǵan, al eń dáýletti adam Ilon Masktyń baılyǵy alǵash ret jarty trıllıon dollardan asyp tústi.
AQSh-ta basqa elderge qaraǵanda mıllıarderler kóp – 932 adam jáne Forbes jýrnalynyń málimetinshe, tek ótken jyldyń ishinde elde 116 jańa mıllıarder paıda boldy.
Halyqaralyq qaıyrymdylyq uıymdar konfederatsııasy mıllıarderlerdiń saıasatqa, BAQ-qa jáne áleýmettik jelilerge baqylaýyn kúsheıtip jatqanyna alańdaýshylyq bildirip otyr.
Mysal retinde Amazon mıllıarderi Djeff Bezostyń The Washington Post gazetin, Ilon Masktyń Twitter/X kompanııasyn, Patrık Sýn-Shıongtyń Los Angeles Times gazetin satyp alýyn jáne ońshyl mıllıarder Vınsent Bollordyń frantsýzdyq CNews gazetin ıelenýin keltirýge bolady.
- Sýper baılardyń bizdiń saıasatymyzǵa, ekonomıkamyzǵa jáne BAQ-qa shamadan tys yqpaly teńsizdikti ýshyqtyryp, bizdi kedeıshilikpen kúres baǵytynan alshaqtatty, - dedi Oxfam atqarýshy dırektory Amıtabh Behar.
Uıym sonymen qatar mıllıarderlerdiń saıası laýazymdardy ıelený yqtımaldyǵy qarapaıym azamattarǵa qaraǵanda 4 myń ese joǵary ekenin eseptep, World Values Survey-diń 66 eldi qamtıtyn saýalnamasyn keltirdi, oǵan sáıkes suralǵandardyń jartysyna jýyǵy baılardyń óz elderindegi saılaýlardy jıi satyp alatynyn aıtty.
- Baılar men qalǵandar arasyndaǵy alshaqtyqtyń artýy bir mezgilde óte qaýipti jáne turaqsyz saıası tapshylyqty týdyrady, - dedi Behar.
Esep 19 qańtarda Shveıtsarııanyń Davos qalasynda bastalatyn Dúnıejúzilik ekonomıkalyq forýmmen (DEF) tuspa-tus keldi.
Bıylǵy jyly forýmǵa «álemniń 850-ge jýyq jetekshi bas dırektorlary men dırektorlar keńesiniń tóraǵalary», sondaı-aq saıası kóshbasshylar qatysyp otyr.
Buǵan deıin G20 elderindegi mıllıarderlerdiń jıyntyq baılyǵy 16,5 paıyzǵa ósip, 15,6 trln dollarǵa jetkenin jazdyq.