Mıllıarder krıptovalıýta bolashaǵy týraly: Bıtkoın altyndy almastyrady
ASTANA. QazAqparat - Baılyǵy bıtkoınmen eseptegende mıllıard dollardy quraıtyn Kemeron Ýınklvoss, aldaǵy ýaqytta krıptovlıýtanyń 20 esege ósetindigin boljady, dep jazady Bloomberg.
Eske sala keteıik, amerıkalyq egizder Taıler men Kemeron Ýınklvosstar álemdegi tuńǵysh bıtkoındyq mıllıarder atanǵandyǵy týraly biz buǵan deıin habarlaǵan bolatynbyz .
Bloomberg-ge bergen suhbatynda Bıtkoındy mıllıarder Ýınklvoss mundaı esepti, óz oıynsha qazirgi quny 6 trıllıon dollardy quraıtyn naryqtaǵy altyn baǵasyna negizdep jasaǵandyǵyn aıtty.
Onyń pikirinshe, bolashaqta bıtkoın altyndy almastyrady. Aǵasy Taıler ekeýi krıptovolıýtalyq operatsııalardy jalǵastyra bermek.
Sonymen qatar, ol óziniń baılyǵy, qolynda qansha bıtkoın bar ekeni týraly naqty málimet berýden bas tartty.
Aǵaıyndy egizder - Taıler jáne Kemeron Ýınklvosstar ózderiniń HarvardConnection atty áleýmettik jeli jobalaryn 2003 jyly Garvard ýnıversıtetiniń stýdentteri bolyp júrgende bastaǵan. Keıin olar bul jobaǵa Mark Tsýkerbergti jaldaǵan. Eki aıdyń ishinde Tsýkerberg jumys berýshilerimen emes, Edýardo Saverınmen birlesip óziniń jeke áleýmettik jelisin dúnıege ákelgen bolatyn.
