Mıllıarder Gonkong turǵyndaryna 10 mln maskany tegin taratpaq
GONKONG. QazAqparat – Óner týyndylarynyń kollektsııalaryn jııýshy Adrıan Chen (Adrian Cheng) koronavırýs pandemııasyna qarsy kúres kezinde Gonkong turǵyndaryna mıllıondaǵan medıtsınalyq maskany tegin taratady. Bul maqsatta 35 saýda avtomaty salynbaq. Olar Gonkongtyń túrli bólikterinde ornatylady, dep habarlaıdy QazAqparat CNN-ge silteme jasap.
Bıznes ımperııanyń murageri Chen maskalardyń birinshi partııasy álsiz adamdar toptary men tabysy tómen otbasylarǵa taratylatynyn málim etti. Olarǵa maskalardy avtomattardan alý úshin arnaıy smart kartalar beriledi.
Azııanyń basqa birneshe elderi sııaqty, Gonkong ta óz turǵyndaryna Covid-19 koronavırýsy órshigen kezden bastap mindetti túrde maska taǵýdy keńes etken.
Chen New World Development kompanııasynyń bas dırektory ári atqarýshy vıtse-tóraǵasy, sonymen qatar óner týyndylaryn tanymal jııýshy.
Byltyr ol Gonkongta óziniń jarqyn sáýlet jáne ónerimen keńinen tanymal bolǵan K11 Musea saýda ortalyǵyn ashty. Forbes Chen otbasynyń dáýletin 20,7 mıllıard dollarǵa baǵalap otyr.
Maskalardy taratý avtomattary sáýirdiń sońynda qalanyń 18 aýdanynda ornalastyrylady.
Johns Hopkins University málimetterinshe, qazirgi kezde Gonkongta indetke shaldyǵýdyń 1000-ǵa jýyq oqıǵasy tirkelip, vırýstan tórt adam qaıtys bolǵan.
