Mıllıarder Djek Ma Amerıkaǵa 1 mln maska syıǵa tartty
NUR-SULTAN. QazAqparat - Alibaba kompanııasynyń negizin qalaýshy Djek Ma AQSh-qa medıtsınalyq maska men koronavırýsty anyqtaıtyn testilerdi syıǵa tartty, dep jazady VVS.
Qytaı mıllıarderi Twitter-degi paraqshasyna Shanhaıda turǵan júk ushaǵynyń fotosyn jarııalady. Buǵan deıin ol Amerıkaǵa 500 myń test pen 1 mıllıon maska syıǵa tartatynyn málim etken edi.
«Djek Ma Eýropaǵa da birqatar medıkamentter jiberip jatyr. Ol pandemııamen kúresý úshin halyqaralyq yntymaqtastyqqa shaqyrdy», - dep jazady VVS.
Onyń aıtýynsha, kompanııa Japonııa, Ońtústik Koreıa, Italııa, Iran men Ispanııaǵa da medıkamentter jetkizgen. Sonymen qatar qazirgi tańda búkil Eýropaǵa taratý úshin 2 mln maska daıyndap jatyr.
Aıta ketý kerek, buǵan deıin Microsoft kompanııasynyń negizin qalaǵan Bıll Geıts pen áıeli Melında Geıts vırýstyń taralýyn toqtatýmen kúresý sharalaryna 100 mln dollar bóletinin habarlaǵan edi.
