Mıllıarder aptasyna úsh-aq kún jumys isteý týraly usynys aıtty
ASTANA. QazAqparat - Álem boıynsha dáýleti jaǵynan ekinshi adam sanalatyn meksıkalyq mıllıarder Karlos Slım aptasyna úsh-aq kún jumys isteý týrasynda usynys bildirdi. Onyń aıtýynsha, mundaı shara jumyssyzdyq máselesin sheshýge kóp kómektesedi.
Dese de, ol osymen qatar zeınetke shyǵý jasyn 75-ke deıin kóterýdi de umyt qaldyrmady. Mıllıarderdiń sózine qaraǵanda, adamdar aptasyna jalpy alǵanda 32-33 saǵat jumys istegen jaǵdaıda bul óz kezeginde eki qolǵa bir kúrek tappaı júrgenderdi jumysqa ornalastyrýǵa múmkindik beredi. Sondaı-aq, ol zeınetke shyǵý jasy uzartylatyn bolsa, bul óz kezeginde tájirıbe jınaýǵa kóp kómektesetinin de tilge tıek etti. Ispanııanyń Alıkante qalasynda osy usynysyn ortaǵa tastaǵan mıllıarder osylaısha adamdarǵa aptasyna úsh kún jumys istetý arqyly jumyssyzdyq máselesin (ıaǵnı, aptanyń qalǵan kúnderinde jumyssyz júrgenderdiń eńbegimen toltyrý arqyly) sheshýge bolatynyn jetkizdi. Ol bul usynysyn Ispanııada beker aıtqan joq. Óıtkeni, Ispanııa Eýrodaqqa múshe elder ishinde jumyssyzdyq qatty beleń alǵan elderdiń kósh basynda tur. Naqtyraq aıtqanda, bul eldegi jumyssyzdyqtyń zaryn tartyp júrgenderdiń qarasy shamamen 23 paıyzdy quraıdy. Al jastar arasynda jumyssyzdyq 40 paıyzdan asyp ketken. Aıta keteıik, osynaý usynysty bildirgen Karlos Slımniń dáýleti álemdegi baılardyń jıǵan-tergenin shotqa salyp, eseptep otyratyn Forbes jýrnalynyń málimetinshe, 77 mlrd. dollardy quraıdy eken. Onyń aktıvteri telekommýnıkatsııa, qurylys salasynda jáne tsement óndirisinde, dep jazady islam.kz.
