Mıllıarder Anısımovtiń qyzy Nıý-Iorktegi penthaýsty satýǵa uıǵardy
ASTANA. 7 sáýir. QazAqparat - Reseılik mıllıarder Vasılıı Anısımovtiń qyzy - Anna Anısımova Manhettendegi apartamentin 50 mıllıon dollarǵa satýǵa shyǵardy, dep habarlady Lenta.rý.
The Wall Street Journal basylymnyń habarlaýynsha, páterdi sondaı-aq aıyna 60 myń dollarǵa jalǵa alýǵa bolady.
Basylymnyń málimetterine qaraǵanda, Ortalyq saıabaqqa qarap turǵan penthaýs Time Warner Center turǵyn úı kesheniniń 75-qabatynda ornalasqan. Avtorlyq dızaınmen árlengen 10 bólmeli apartamenttiń aýmaǵy 360 sharshy metrdi quraıdy.
Anısımova bul páterdi 2004 jyly 19 jasynda 9,86 mıllıon dollarǵa satyp alǵan bolatyn. Onyń aıtýynsha, jyljymaıtyn múlikti satý onyń kúıeýi - prodıýser ári Sunrise Pictures kınokompanııasynyń bas dırektory Pıter Shafermen birge Los-Andjeleske qonys aýdarý nıetinen týyndaǵan.
Eger apartament osy baǵaǵa satylsa, ol Nıý-Iorktegi eń qymbat ekinshi páter bolmaq. Manhettenniń búkil tarıhyndaǵy eń qymbat jyljymaıtyn múlik ótken jyly «Ýralkalııdiń» burynǵy ıesi Dmıtrıı Rybolovlevtiń qyzy Ekaterına ákesiniń senimhatymen satyp alǵan 88 mıllıon dollardyń elıtalyq penhaýsy boldy.
Vasılıı Anısımov metallýrgııa bıznesinde dáýlet jıǵan. Búginde ol Coalco developer kompanııasynyń jáne Máskeýdiń «Krıstall» zaýytynyń ıesi. 2011 jyldyń qorytyndysymen Forbes jýrnaly kásipkerdiń dáýletin 3,4 mıllıard dollarǵa baǵalady (Reseıdiń asa baı adamdarynyń tiziminde 30-orynda).
