Mıllıard qytaıdyń meıirimin oıatqan vıdeo
ASTANA. QazAqparat - Jaqynda qytaıdyń áleýmettik jelilerinde «Taǵy da teri kıimderin kıesiz be?» degen taqyryppen shaǵyn vıdeo jarııalandy, dep habarlaıdy QazAqparat tilshisi.
Beınerolık tarala sala mıllıart qytaı kózderine jas alyp, júrekterine meıirim ornap, saharanyń sáni bolǵan jabaıy ań-qustardy qorǵaýdyń túrli aıla tásilderin qarastyryp jatqan kórinedi.
Bul vıdeony kórgende shynymen júregińiz aýyrady. Onda, ańdardy tirideı soıyp, aıaq-qoldaryn shaýyp, terisin sypyryp jatqanyn anyq kórýge bolady.
Muny kórgen qytaıdyń áıgili rejısseri Fyń Chıaýgań, áıgili áıel, kıno juldyzy jáne ánshisi Lıý Rolıń bastaǵan tanymal júldyzdar teriden jasalatyn baǵaly kıimderdi shekteýdi dáriptep júr eken.
Osy beınerolıkti kórgen taǵy bir qytaı azamatshasy «Beıkúná jan ıesiniń terisi tirideı sypyrylyp alyndy. Sol sátte sońǵy ret jantalasyp, basyn kóterip, óz denesine qarady. Bul netken rahymsyzdyq?! Terisinen tirideı aıyrylǵan janýar qaıta qaraýǵa bata almady. Janarynan sharasyzdyqtan jas tamyp, kóp uzamaı máńgilikke kelmeske attanyp kete bardy. Endi, mundaı jaýyzdyqty jasamaıyqshy», dep jazady.
Ádette ań terilerinen jasalatyn buıymdardyń barlyǵy osyndaı qatigezdikpen keletini jasyryn emes. Mundaı aıýandyq áreketter bizdiń elde de tolyp jatyr. Osyǵan deıin, qasqyrdyń jáne ıttiń kúshikterin tirideı qol-aıaǵyn syndyrǵandar, koımen kúresken «balýandarymyz» ózderiniń áreketterin áleýmettik jelige júktep, maqtanyp, artynsha jazaǵa tartylǵan bolatyn.
Ań-qustardy aıalaıyqshy, aǵaıyn.
ESKERTÝ: Beınerolıkte ańdarǵa qatygezdik kórsetý sáti beınelengen. Sezimtal, júregi nashar jandarǵa kórýge bolmaıdy!
