Mıllenıaldar eńbekqor, al zýmerler talǵampaz keledi – sarapshy jas býyn ereksheligi jaıly
ASTANA. KAZINFORM — Búginde jastar arasynda býyndar arasyndaǵy kózqaras qaıshylyǵy jıi baıqalady. Mamandar olardy týǵan kezeńine qaraı mıllenıaldar, zýmerler jáne alfa býyny dep jikteıdi. Ár býynnyń ósken ortasy men qalyptasqan dáýirine baılanysty ózindik erekshelikteri bar.
Bul týraly «Jastar» ǵylymı-zertteý ortalyǵynyń dırektory Gúlishan Nahbaeva Jibek Joly arnasyndaǵy «Búgin LIVE» baǵdarlamasyna bergen suhbatynda málimdedi.
- Jastar saıasaty týraly zańǵa sáıkes, jastar sanatyna 14 pen 35 jas aralyǵyndaǵy azamattar kiredi. Bizdiń ortalyq mamandary jastardy birneshe jas ereksheligi boıynsha jikteıdi: 14–18, 18–25, 25–29 jáne 29–35 jas. Ár toptyń ishinde de ózindik aıyrmashylyqtar bar, olardyń qatarynda mıllenıaldar men zýmerler de kezdesedi. Mysaly, mıllenıaldar býyny bilimge qushtar, kitap oqýǵa jaqyn ári eńbekqor bolyp qalyptasqan. Bul qasıetter olardyń boıyna ata-anasynyń eńbekke baýlý tárbıesi arqyly sińgen.
Al búgingi jastar tsıfrlyq dáýirde óskendikten, mobılografııa, ІT sekildi jańa ári kreatıvti mamandyqtarǵa kóbirek qyzyǵýshylyq tanytady. Osyǵan baılanysty jumysshy mamandyqtaryn tańdaýǵa asyǵa bermeıdi, - deıdi Gúlishan Nahbaeva.
Spıker sózinshe, zýmer býynyna jumys usynylsa, olar birden kelise salmaıdy.
– Jastar aldymen jalaqy kólemin, jumys jaǵdaıyn, basshylyqtyń talaptaryn saralap, óz betinshe zertteý júrgizedi. Tek barlyq sharttarǵa kóz jetkizgennen keıin ǵana jumys isteýge daıyn nemese daıyn emestigin bildiredi. Biraq bul býyn memleketpen tyǵyz jumys isteýge qushtar, - dedi ol.
Sondaı-aq ol keıingi býynnyń saıası kózqarasy men belsendiligi týraly da aıtyp berdi.
- Qazirgi jastar sheshim qabyldaýda shapshań ári belsendi. Olar memlekettiń saıası úderisterine qatysyp, óz daýysy men ustanymyn ashyq bildirýge umtylady. Memleket olarmen ashyq pikir almasqanyn qalaıdy.
Sonymen birge jastar tek qoldaý alýshy emes, memleketpen seriktestik negizde jumys isteýge múddeli. Búginde elimizde jastarǵa arnalǵan 25-ke jýyq memlekettik grant jobasy júzege asyrylyp jatyr. Olardyń qatarynda Prezıdenttik jastar kadr rezervi, «Bolashaq» halyqaralyq bilim berý baǵdarlamasy, «Jastar praktıkasy» sekildi bastamalar bar. Mundaı jobalar jas býynnyń yntasyn arttyryp, damýyna serpin berip keledi, - deıdi ol.
Aıta keteıik, buǵan deıin maman alfa urpaq tárbıesindegi basty qaǵıdany ataǵany jazylǵan bolatyn.
