Mılıch Chýrchıch «Qyzyljar» fýtbol komandasynyń tizginin ustady

ASTANA. KAZINFORM – «Qyzyljar» komandasyna jańa bas bapker taǵaıyndaldy. Bul týraly Kazinform Sports.kz saıtyna silteme jasap habarlaıdy.

Bul qyzmetti 44 jastaǵy serbııalyq maman Mılıch Chýrchıch atqaratyn boldy.

Ol buǵan deıin qostanaılyq «Tobyl» klýbyn jattyqtyrǵan. Chýrchıchtiń jetekshiligimen «Tobyl» 2023 jyly Qazaqstan kýbogyn, 2024 jyly Qazaqstan Sýperkýbogyn jeńip aldy. 

«Qyzyljardaǵy» bapkerlik shtabqa eki kómekshisi qosyldy. Olar – Serbııanyń jastar jáne ulttyq quramalaryndaǵy jumysymen tanymal Ivan Evıch pen dene shynyqtyrý boıynsha tájirıbeli jattyqtyrýshy Evgenıı Kresık. 

QPL-dyń jańa maýsymynda petropavldyq komanda 4 matchtan keıin eki upaı enshilep, 11-orynǵa turaqtady. Degenmen Qazaqstan kýbogynyń 1/8 fınalynda «Qyzyljar» komandasy «Qaısardy» 1:0 esebimen jeńip, alǵashqy kezdesýinde jeńiske jetti. 

Eske sala keteıik, buǵan deıin Aleksandr Brazevıch «Qyzyljardyń» bas bapkeri qyzmetinen ketken bolatyn.