«Mılannyń» eks-fýtbolshysy Qazaqstan quramasynda oınaı ma?
ASTANA. 25 qarasha. QazAqparat - Qazaqstan fýtbol federatsııasy ulttyq qurama qataryna 21 jastaǵy jartylaı qorǵaýshy Aleksandr Merkeldi aldyrýǵa tyrysyp baǵýda, dep habarlaıdy sports.kz.
Aleksandr Merkel Shyǵys Qazaqstan oblysynyń Pervomaıskıı kentinde dúnıege kelgen. Keıin Reseıdiń Rostovyna kóship, ol jaqtan 6 jasynda Germanııaǵa qonys aýdarady. Aleksandr «Shtýtgart» klýbynyń jastar komandasynda óner kórsetip, mamandar kózine túsedi. Sóıtip, Italııaǵa shaqyrtý aldy. Áıgili «Mılan» jeıdesinde óner kórsetken Merkel keıin «Djenoa», «Ýdıneze» klýbtarynda oınady. Sońǵy atalǵan komandada qazir de dop teýip júr.
A. Merkeldiń ózi Reseı quramasynda oınaǵysy keletinin málimdegenine qaramastan QFF ókilderi jas fýtbolshymen kezdesip, ony Qazaqstannyń kók baıraǵynyń namysyn qorǵaýǵa kóndirmek. A. Merkel Qazaqstanda týǵandyqtan oǵan qujat ázirleý asa qıynǵa soqpasy anyq.
