Mılannan koronavırýs juqtyryp kelgen qazaqstandyqpen bir bortta bolǵan 89 jolaýshynyń bári anyqtaldy
NUR-SULTAN. QazAqparat – Mılannan koronavırýs juqtyryp kelgen qazaqstandyqpen bir bortta kelgen 89 jolaýshynyń bári anyqtaldy. Bul týraly Nur-Sultan qalasynyń Qoǵamdyq densaýlyq saqtaý basqarmasynyń basshysy Sáýle Qısyqova málim etti, dep habarlaıdy QazAqparat tilshisi.
«13 naýryzda Nur-Sultanda Mılannan «Máskeý-Nur-Sultan» áýe reısi arqyly kelgen áıelden koronavırýs ınfektsııasyn juqtyrǵany anyqtalyp, qalamyzda birinshi jaǵdaı tirkelgen edi. Italııa, ózderińiz biletindeı, epıdemıologııalyq ahýal boıynsha 1A sanatyna jatady. ıAǵnı, osy elden kelgen azamattar oqshaýlanýy kerek. Osy ereje boıynsha Qazaqstan azamaty oqshaýlandyrylyp, oǵan laboratorııalyq zertteý júrgizilip, ol adamnyń koronavırýsty juqtyrǵany anyqtaldy», - dedi basqarma basshysy OKQ-da ótken baspasóz máslıhatynda.
Onyń aıtýynsha, koronavırýs ınfektsııasyn juqtyrǵan áıelmen birge bortta 89 jolaýshy bolǵan. Onyń ishinde 42 - Qazaqstan azamaty, sheteldik 47 azamat bolǵan (RF – 42, Nıderlandy – 1, Avstralııa – 1, AQSh – 1, Ýkraına – 1, Meksıka – 1).
«Osy 89 adamnyń bári de tabyldy. Osy adamdardyń ishinde Nur-Sultannan syrtqa 35 jolaýshy shyǵyp ketken. Onyń ishinde 14-i Qazaqstan ishine tarap ketken. Óńirlerdegi áriptesterimizge olar týraly málimetti berdik. Búgin saǵat 08.00 kezinde osy adamdardy tabý boıynsha tekserý júrgizdik. Aımaqtarda olardy oqshaýlaý boıynsha jumys júrgizilýde», - dedi ol.
Sáýle Qısyqova atalǵan borttaǵy taǵy 21 jolaýshy Reseıge ushyp ketkenin aıtady.
«Nur-Sultan qalasy boıynsha 54 jolaýshynyń 53-i elordadaǵy statsıonarlarǵa jatqyzylǵan. RF-nyń bir azamaty dıplomatııalyq rang pen RF elshiliginiń nota berýine baılanysty elshilik aýmaǵynda qaldy. 57 adam aýrýhanaǵa tolyǵymen jatqyzyldy. Tolyqqandy laboratorııalyq jumys júrgizildi. Nátıje tekserilýde», - dedi ol.
