Mılanda tramvaı relsten shyǵyp ketip, ǵımaratqa soǵyldy: qaza tapqandar bar
ASTANA. KAZINFORM – Italııanyń Mılan qalasynda tramvaı relsten shyǵyp ketip, ǵımaratqa soǵyldy, dep habarlaıdy Euronews.
27 aqpanda Vıale Vıttorıo Veneto kóshesinde №9 baǵyttaǵy, Porta-Djenovaǵa bet alǵan tramvaı basqarýdy joǵaltyp, jol jıegindegi ǵımaratqa soǵylǵan. Saldarynan jaıaý júrginshiler zardap shegip, dúken sóresi qıraǵan.
Qutqarý qyzmetiniń málimetinshe, eki adam qaza tapqan, shamamen 40 adam jaraqat alǵan. Zardap shekkenderdiń biri aýyr halde jatyr.
Mılan prokýratýrasy abaısyzda adam ólimine ákep soqtyrdy degen kúdikpen tergeý bastady. Aldyn ala málimet boıynsha, apat joǵary jyldamdyqtaǵy soqtyǵys saldarynan bolýy múmkin.
Corriere della Sera basylymynyń jazýynsha, apatqa ushyraǵan tramvaı – qalada birneshe apta buryn ǵana qatynaı bastaǵan jańa Tramlink úlgisi. Qarastyrylyp jatqan nusqalardyń qatarynda júrgizýshiniń kenetten ózin jaısyz sezinýi nemese baǵyttama tetiginiń aqaýy bar.
Aıta keteıik, Italııa Ryanair kompanııasyna 1 mlrd eýroǵa deıin aıyppul salýy múmkin.
