Mılanda tártip buzǵan 160 adam ustaldy
ASTANA. KAZINFORM — Italııanyń quqyq qorǵaý organdary Mılan ortalyǵyndaǵy tártipsizdikterdiń ekinshi kúni 160-qa jýyq adamdy ustady. Olardyń basym bóligi — kámeletke tolmaǵandar, dep habarlaıdy Kazinform agenttiginiń menshikti tilshisi ıtalıandyq BAQ pen polıtsııa málimetterine silteme jasap.
Tártipsizdikter 18 qazan, jeksenbi kúni Pıatstsa-del-Dýomo alańy men oǵan irgeles kóshelerde, sonyń ishinde Vıa-Torıno kóshesinde bastalǵan edi.
ANSA agenttiginiń málimetinshe, negizinen qara kıingen, betterin jasyrǵan birneshe júzdegen jas dúkenderdiń áınekterin syndyryp, sýpermarketter men saýda oryndaryn tonaǵan.
Sondaı-aq qoqys jáshikterin, velosıpedter men kóshe jıhazdaryn tóńkerip, polıtsııa qyzmetkerlerine túrli zat laqtyrǵan.
Zardap shekken nysandar qatarynda Carrefour sýpermarketi, Under Armour, Levi’s, Decathlon dúkenderi men Rinascente ámbebap dúkeni bar. Polıtsııa kózden jas aǵyzatyn gaz ben sý atqyshtardy qoldandy. Keshke qoǵamdyq tártip qalpyna keltirilip, Vıttorıo-Emanýele II galereıasy qorshaýǵa alyndy. Al Dýomo sobory týrıster úshin erterek jabyldy.
Quqyq qorǵaý organdarynyń málimetinshe, ustalǵandardyń 80 paıyzy — kámeletke tolmaǵandar. Olar shaǵyn toptarmen áreket etip, áleýmettik jeliler arqyly uıymdasqan.
Budan bólek 17 qazanda Italııanyń Mılan, Týrın, Bolonıa jáne basqa da qalalarynda ómir súrý qunynyń, janarmaı baǵasynyń ósýine jáne salyq júktemesiniń artýyna qarsy Italia in Piazza qozǵalysynyń narazylyq aktsııalarynda osyndaı qaqtyǵystar bolǵan edi.
Polıtsııa málimetinshe, senbi kúni el boıynsha 197 adamnyń jeke basy anyqtalyp, 28 adam qamaýǵa alynǵan. Olardyń 12-si kámeletke tolmaǵandar bolsa, altaýy shetel azamattary. Budan bólek taǵy 43 adamnyń isi quqyq qorǵaý organdaryna joldandy. Tártipsizdikten 141 polıtsııa qyzmetkeri zardap shegip, Mılandaǵy dúkenderge 500 myń eýrodan astam shyǵyn kelgen.
Italııa premer-mınıstri Djordja Melonı 19 qazanda Rımde qoǵamdyq qaýipsizdik máseleleri boıynsha keńes ótkizedi. Jıynda beıbit sherýlerdi zorlyq-zombylyq pen tártipsizdikke paıdalanatyndarǵa qarsy qosymsha sharalar qarastyrylady.
Mılan meri Djýzeppe Sala qala ortalyǵyndaǵy buzaqylyq pen tonaý áreketterin aıyptady. Sondaı-aq Іshki ister mınıstri Matteo Pıantedozı de polıtsııa basshylyǵymen keńes ótkizdi.
Italııalyq BAQ eldegi tártipsizdikterdi Frantsııadaǵy ómir súrý qunynyń ósýine qarsy narazylyqtarmen salystyryp otyr.
Buǵan deıin Italııada 20 qarashada jappaı ereýil ótetinin habarlaǵan bolatynbyz.
