Mılanda Palestınany qoldaý sherýi qaqtyǵysqa ulasty: keminde 60 polıtseı jaralandy
MILAN. KAZINFORM — Italııada ondaǵan myń adam Palestınany qoldap mıtıngige shyqty. Mılanda polıtsııamen qaqtyǵystar bolyp, keminde 60 tártip saqshysy jaralandy, dep habarlaıdy DW.
Dpa agenttiginiń habarlaýynsha, Italııada ondaǵan myń adam Palestınany qoldaý úshin kóshege shyqty. Mılan qalasynda mıtıng kezinde polıtsııamen qaqtyǵystar bolyp, keminde 60 polıtsııa qyzmetkeri jaralandy, olardyń 23-i aýrýhanaǵa jetkizilgen. Aktsııaǵa qatysýshylar arasyndaǵy zardap shekkender týraly málimet ázirge joq.
Jappaı tártipsizdikter Gaza sektoryndaǵy halyqpen yntymaqtastyq retinde uıymdastyrylǵan ulttyq ereýil aıasynda ótken mıtıngten keıin bastalǵan. Kýágerlerdiń aıtýynsha, narazy top Mılannyń basty temirjol vokzalyna kúshtep kirýge tyrysqan.
Sondaı-aq, dpa agenttigi mıtıngige qatysqandar arasynda tas laqtyrǵandar bolǵanyn habarlaıdy. Polıtsııa olarǵa qarsy kóz jasaýratatyn gaz qoldanǵan.
Italııa premer-mınıstri Djordja Melonı tártipsizdikke qatysqandardy synǵa aldy.
— Zorlyq pen qıratýlar — bul shynaıy yntymaqtastyqqa esh qatysy joq áreketter. Olar Gazadaǵy adamdardyń ómirin esh ózgerte almaıdy, — dep jazdy úkimet basshysy X áleýmettik jelisinde.
Indegne le immagini che arrivano da Milano: sedicenti “pro-pal”, sedicenti “antifa”, sedicenti “pacifisti” che devastano la stazione e generano scontri con le Forze dell’Ordine.
— Giorgia Meloni (@GiorgiaMeloni) September 22, 2025
Violenze e distruzioni che nulla hanno a che vedere con la solidarietà e che non cambieranno di una… pic.twitter.com/dpurnN5CBM
Mundaı aýqymdy narazylyqtar Italııanyń basqa qalalarynda da ótip jatyr. Bul oqıǵalar BUU Bas Assambleıasynyń otyrysymen tuspa-tus kelip otyr.
Aıta keteıik, BUU Bas Assambleıasynda Uıymnyń 80 jyldyǵyna arnalǵan saltanatty jıyn ótti.
Frantsııa prezıdenti Emmanıýel Makron Nıý-Iorkte ótip jatqan BUU Bas Assambleıasynyń otyrysynda sóılep, óz eliniń Palestına memleketin resmı túrde moıyndaıtynyn jarııalady.
Sonymen qatar Ulybrıtanııa, Kanada, Aýstralııa jáne Portýgalııa Palestınany moıyndaǵanyn jarııa etken edi. Búgin olarǵa Belgııa, Lıýksembýrg, Malta, San-Marıno jáne Andorra qosylady.
Budan buryn assambleıada sóz sóılegen BUU Bas hatshysy Taıaý Shyǵystaǵy jaǵdaı tózgisiz jáne saǵat sanap nasharlap bara jatqanyn aıtty.