Mılanda myńdaǵan adam antımıgratsııalyq narazylyqqa shyqty

ASTANA. KAZINFORM – Mılanda antımıgratsııalyq narazylyqqa myńdaǵan adam shyqty. Shara barysynda Majarstan premer-mınıstrine alǵys aıtylyp, Frantsııada bıliktiń aýysýy múmkin ekeni týraly pikirler aıtyldy, dep habarlaıdy nemis basylymy DW.

Aktsııa «Qorqynyshsyz – Eýropada biz óz úıimizdiń ıesimiz!» degen uranmen Mılannyń Dýomo sobory aldynda ótti. Ony Italııanyń vıtse-premeri, «Lıga» ulttyq partııasynyń kóshbasshysy Matteo Salvını uıymdastyrdy. Mıtıngte sóz sóılegen ol jýyrda parlamenttik saılaýda jeńilis tapqan Majarstan premer-mınıstri Vıktor Orban týraly aıtty.

– Qurmetti Vıktor, sen shekaralardy qorǵap, adam jáne qarý saýdasymen kúrestiń. Bárimiz birge osy erkindik pen zań ústemdigi jolyndaǵy kúresti jalǵastyraıyq, – dedi Salvını.

Sharaǵa Eýroparlamenttegi úshinshi iri kúsh sanalatyn «Patrıottar Eýropa úshin» blogy aıasyndaǵy Salvınıdiń odaqtastary da qatysty. Nıderlandydaǵy «Bostandyq partııasynyń» jetekshisi Gert Vılders mıtıng barysynda Eýropanyń baıyrǵy turǵyndary «negizinen ıslam elderinen kelgen zańsyz jappaı ımmıgratsııa tolqynynan zardap shekti» dep málimdedi.

Al Frantsııadaǵy «Ulttyq birigý» partııasynyń resmı jetekshisi Djordan Bardella aldaǵy prezıdenttik saılaýda partııasynyń, ıaǵnı Marın Le Pen bastaǵan saıası kúshtiń jeńiske jetý múmkindigin joǵary baǵalady.

– Biz Makronmen qoshtasýǵa daıyndalyp jatyrmyz, – dedi ol qazirgi Frantsııa prezıdenti Emmanıýel Makron týraly.

Buǵan deıin Marın Le Pen 2027 jyl ásire ońshyl kúshter úshin sheshýshi kezeń bolatynyn málimdegen. Onyń pikirinshe, Frantsııa, Italııa, Ispanııa jáne Polshadaǵy aldaǵy saılaýlar Eýropalyq odaqtyń baǵytyn ishten túbegeıli ózgertýge múmkindik beredi.

Sonymen qatar Mılanda osy aktsııamen qatar qarsy demonstratsııa da ótti. Oǵan da myńdaǵan adam qatysyp, ýltraońshyldardyń mıtıngisine narazylyq bildirdi. Eki tarapty polıtsııa bólip turdy.

Aıta keteıik, Irlandııada jappaı narazylyqtan keıin janarmaı salyǵy 505 mıllıon eýroǵa azaıǵanyn jazdyq.