Mılanda Qazaqstan kompanııalarynyń alǵashqy saýda-ekonomıkalyq mıssııasy ashyldy
MILAN. KAZINFORM - Mılanda «QAZAQSTAN – ITALIıA: Qazaqstan jolyndaǵy saýda jáne ınvestıtsııalyq múmkindikter» atty Qazaqstan-Italııa forýmy bastaldy, dep habarlaıdy QR Saýda jáne ıntegratsııa mınıstrliginiń baspasóz qyzmeti.
Іs-sharaǵa Qazaqstan Respýblıkasynyń Saýda jáne ıntegratsııa mınıstri Arman Shaqqalıev, Italııadaǵy Qazaqstannyń Tótenshe jáne Ókiletti Elshisi Erbolat Sembaev, Qazaqstan Respýblıkasynyń Týrızm jáne sport vıtse-mınıstri Erjan Erkinbaev, sondaı-aq Italııa Senatynyń Prezıdenti Ignatsıo La Rýssa, Italııanyń Týrızm mınıstri Danıela Santanke jáne «Made in Italy» vıtse-mınıstri Valentıno Valentını sııaqty joǵary dárejeli ıtalııalyq ókilder qatysty.
Forýmda Qazaqstan Prezıdenti Qasym-Jomart Toqaevtyń 2024 jyldyń qańtarynda Italııaǵa jasaǵan resmı saparynyń qorytyndysy boıynsha bergen tapsyrmalaryn oryndaý barysy talqylandy. Bul Qazaqstan-Italııa qarym-qatynasyn nyǵaıtýdaǵy mańyzdy qadam boldy. Talqylanǵan negizgi taqyryptarǵa jańartylatyn energetıka, agroónerkásip kesheni, týrızm, farmatsevtıka jáne tehnologııalyq ınnovatsııalar kirdi. Sondaı-aq, Qazaqstannyń Eýropa men Ortalyq Azııa arasyndaǵy ekonomıkalyq yntymaqtastyqtyǵynyń strategııalyq mańyzdylyǵy atap ótildi.
Saýda mınıstri Arman Shaqqalıev Italııa Qazaqstan úshin Eýropalyq Odaqtaǵy negizgi saýda seriktesteriniń biri ekenin jáne taýar aınalymy boıynsha úzdik úshtikke kiretinin atap ótti. Yntymaqtastyqty nyǵaıtý aıasynda Qazaqstan ıtalııalyq kompanııalardyń qatysýymen birlesken kásiporyndarda óndirilgen ónimdi ilgeriletip, taýarlardyń halyqaralyq naryqtaǵy pozıtsııasyn kúsheıtetin «Made with Italy» tujyrymdamasyn engizýdi usyndy.
«Made in Italy» vıtse-mınıstri Valentıno Valentını bul ıdeıany qoldap, birlesken jobalar eki eldegi shaǵyn jáne orta bıznestiń damýyn yntalandyratynyn aıtty. Sondaı-aq, forýmda týrızm salasyndaǵy perspektıvalar talqylandy, onda Italııanyń Týrızm mınıstri Danıela Santanke Astana men Mılan arasynda tikeleı reısterdiń iske qosylýy týrısterdiń qatynaýyna úlken úles qosatynyn aıtty.
Bul bastamanyń mańyzdy bóligi qazaqstandyq ónimniń Qazaqstan aýmaǵynda EO jáne Italııa naryǵyna jyldam shyǵýyn qamtamasyz etý úshin eýropalyq sapa standarttaryna kóshý baǵytyndaǵy aldyńǵy qatarly tájirıbe ortalyqtaryn («Excellence Center») qurý bolyp tabylady.
Forým aıasynda ashylǵan Italııadaǵy qazaqstandyq kompanııalardyń alǵashqy saýda-ekonomıkalyq mıssııasyna erekshe nazar aýdaryldy. Mıssııaǵa aýyl sharýashylyǵy, munaı servıstik qyzmetter, toqyma ónerkásibi, týrızm jáne IT sııaqty sektorlardy qamtıtyn 50-den astam qazaqstandyq kásiporyn qatysty.
«QazTrade» AQ bas dırektory Jeńis Óserbaıdyń aıtýynsha, mıssııa jańa seriktestikterdiń damýy men perspektıvaly jobalardy júzege asyrý úshin úlken múmkindikter beredi.
Forýmda Maire Group, Ansaldo Energia, Filiera Italia, Confindustria Kazakhstan jáne basqa da jetekshi kompanııalardyń ókilderi sóz sóıledi. Forýmnyń negizgi maqsaty – eki eldiń úkimettik jáne bıznes qurylymdary arasyndaǵy ózara saýda-ekonomıkalyq yntymaqtastyqty damytýǵa yqpal etetin dıalog pen ıdeıalarmen almasýǵa arnalǵan alań qurý boldy. Bul ózara saýda-ınvestıtsııalyq yntymaqtastyqty damytýǵa yqpal etedi.
Saýda mıssııasy Qazaqstan men Italııa arasyndaǵy ekonomıkalyq baılanystardy nyǵaıtý jáne yntymaqtastyqtyń jańa múmkindikterin izdeý maqsatyndaǵy B2B kezdesýler jáne kórmelerge qatysý arqyly jalǵasady.
Anyqtama: 2023 jyly Qazaqstan men Italııa arasyndaǵy taýar aınalymy 7,8%-ǵa ósip, 16,1 mlrd dollardy qurady. Qazaqstan eksporty 14,8 mlrd dollardy, ımport – 1,2 mlrd dollardy qurady. 2024 jyldyń 8 aıynda taýar aınalymy 33%-ǵa ósip, 13,8 mlrd dollarǵa jetti, al qazaqstandyq eksport 36%-ǵa ósti (12,9 mlrd dollar). Negizgi ósý draıverleri: shıki munaı (+38,1%), kómir (+309,5 ese), zyǵyr tuqymdary (+4,1 mln dollar), propılen polımerleri (+71,6 ese) jáne t.b.
Forým aıasynda sondaı-aq «Qazaqstan Konfındýstrııasy» qaýymdastyǵy uıymdastyrǵan Qazaqstan men Italııanyń eldik tusaýkeseri usynyldy. Іs-sharaǵa eki el kompanııalarynyń ókilderi jınalyp, odan arǵy yntymaqtastyq múmkindikterin talqylaý úshin dıalog alańy quryldy. Qaýymdastyq paıdalanatyn ekonomıkalyq dıplomatııa quraldary energetıka, farmatsevtıka, agrarlyq azyq-túlik óndirisi jáne ónerkásip sııaqty sektorlardaǵy kommertsııalyq jáne ınvestıtsııalyq múmkindikterdi keńeıtýge baǵyttalǵan.
