Mılanda dúnıejúzilik EKSPO-2015 kórmesi ashylyp jatyr
ASTANA. QazAqparat - EKSPO-2015 dúnıejúzilik ámbebap kórmesi resmı túrde juma kúni ashylady, dep habarlady TASS.
Sharaǵa 144 el, ondaǵan halyqaralyq jáne úkimettik emes uıym, sonymen qatar júzdegen kompanııa qatysady.
EKSPO-2015 "Planetany tamaqtandyrý. Ómir energııasy" uranymen ótip, taǵam qaýipsizdigi, aýyl sharýashylyq tehnologııalaryn damytý, qorshaǵan ortany qorǵaý jáne tabıǵı resýrstardy únemdeý máselelerine, sonymen qatar túrli aımaqtardyń aspazdyq jáne gastronomıkalyq dástúrlerine arnalady. Kórme aýylynyń aýmaǵynda 52 ulttyq pavılon salyndy.
Jeke pavılondar taǵam tarıhy men aýyl sharýashylyǵyna, azyq-túlik ónimi salasyndaǵy ınnovatsııalarǵa, bıo ár alýandylyǵy men ony saqtaýǵa arnalady.
EKSPO-2015 bas dırektory Pero Gallı habarlaǵandaı, kórme ekspozıtsııalary ǵylym men tehnıkanyń jetistigin ǵana kórsetip qoımaı, aýyl sharýashylyǵy men azyq-túlik ındýstrııasynyń turaqty damýy men planeta turǵyndaryn qaýipsiz taǵammen qamtamasyz etýdiń strategııasyn jasaýǵa shaqyrady.
