Mılan Olımpıadasyndaǵy Qazaqstan quramasy kıim formasynyń úlgileri jarııalandy
ASTANA. KAZINFORM - 2026 jyly Mılanda ótetin Aq oıyndarǵa arnalǵan Qazaqstan olımpıadalyq quramasynyń formasy ýaqytynda tigiledi. Bul jóninde QR Týrızm jáne sport mınıstrligi Sport jáne dene shynyqtyrý isteri komıteti tóraǵasynyń orynbasary Nurlan Esembaev málim etti.
Maketterdiń tehnıkalyq talabyn kelisý jáne jetkizilgen formany baqylaý maqsatynda jumys komıssııasy quryldy. Oǵan QR Týrızm jáne sport mınıstrligi, QR Ulttyq Olımpıada komıteti ókilderi, vedomstvolyq baǵynysty uıymdar men belgili sportshylar tartylǵan.
- Forma komıssııa nazaryna usynyldy, ol kelisildi. Biz kelisimshart jasaǵan fırma ony 2026 jyldyń 5 qańtaryna deıin jetkizýi kerek. Sondaı-aq, Halyqaralyq Olımpıada komıtetimen logotıpterdi qoldanýǵa qatysty kelisý júrip jatyr. Bul boıynsha logotıp qaıda, qaı jaǵynda, qandaı mólsherde bolý qajettigi naqtylanady. Aıta ketsek, forma boıynsha eshqandaı problema joq. Komıssııa HOK-ta kelisilgen sporttyq kıim úlgileriniń tizimin bekitti. Meniń aqparatym boıynsha, forma keldi, eki apta ishinde bekitilgen logotıpter qoldanylady, sodan keıin ol el nazaryna usynylady, - dedi Nurlan Esembaev QR Týrızm jáne sport mınıstrliginiń qoǵamdyq keńesi otyrysynda.
2026 jylǵy qysqy Olımpıadaǵa laıyqtalǵan sporttyq kıim úlgileri jıyntyǵynda sportshylardyń ashylý jáne jabylý rásimderine qatysý úshin saltanatty formasy, sondaı-aq sporttyq is-sharany ótkizý kezeńinde paıdalanatyn syrtqy kıimder bar. Sondaı-aq, sporttyq jattyǵýlar, dene qyzdyrý, sportshylardyń kúndelikti qoldanýǵa arnalǵan jattyǵý jáne kúndelikti formasy eskerilgen. Jalpy, sporttyq kıim úlgileri jıyntyǵy 22 ataýdy qamtıdy. Forma bıýdjetten tys qarajat esebinen satyp alyndy.
Eske salsaq, budan buryn 2026 jylǵy qysqy Olımpıadada Qazaqstan týyn kimder ustap shyǵatyny anyqtaldy.
