Mılan Olımpıadasy: qazaqstandyq sportshylar atletıkalyq qalashyqqa jaıǵasty
MILAN.KAZINFORM – Qazaqstannyń kók baıraǵy Mılandaǵy qysqy Olımpıada oıyndaryna arnalǵan atletıkalyq qalashyqta jelbiredi.
Qazirgi ýaqytta, qazaqstandyq sportshylar Mılan qalasy jáne Lıvıno qar saıabaǵy aýmaǵynda ornalasqan atletter qalashyǵyna jaıǵasyp, Olımpıada oıyndaryna daıyndalyp jatyr.
Aıta keterligi, 2026 jylǵy qysqy Olımpıada oıyndary úshin uıymdastyrýshylar Mılan, Kortına, Bormıo, Lıvıno, Predazo jáne Antteselva qalalarynda alty atletter qalashyǵyn qurdy.
Mılan qalasyndaǵy atletter qalashyǵy qalanyń ońtústik bóliginde ornalasqan, ol 1500-den astam sportshy men qyzmetkerlerdi qabyldaı alady. Oıyndardan keıin qalashyq zamanaýı stýdentter jataqhanasyna aınalady.
Mılan qalasynda 11 qazaqstandyq sportshy short-trek, konkımen júgirý jáne mánerlep syrǵanaý jarysynda óner kórsetedi. Al Lıvıno qar saıabaǵynda otandastarymyz frıstaıl-mogýl jáne frıstaıl-akrobotıka sportynan jarys jolyna shyǵady.
Jataqhanalar men meıramhanalardan basqa, atletter qalashyǵynda fıtnes ortalyǵy, qalpyna keltirý aımaǵy, kádesyı dúkeni, ortaq keńistikter jáne demeýshilerge arnalǵan kórme alańdary bar.
Sonymen qatar, onda makııaj, kıbersport jáne tósbelgi almasý sııaqty tájirıbelik is-sharalar uıymdastyrylady.
Eske salsaq, Búgin Italııanyń Mılan jáne Kortına-d’Ampetstso qalalarynda XXV qysqy Olımpıada oıyndary resmı túrde bastalady.
Baıraqty básekege Qazaqstan quramasynan 36 sportshy qatysady. Qazaqstan quramasynyń ortasha jasy – 25 jas. Eń jas sportshy – frıstaıl-akrobatıkadan synǵa túsetin 16 jastaǵy Asan Asylhan. Al eń tájirıbeli sportshy – short-trekshi 33 jastaǵy Abzal Ájǵalıev. Quramadaǵy eń ataqty sportshy – frıstaıl-mogýldan baq synaıtyn ıÝlııa Galysheva.
