«Mılan» bas juldyzy Balotellıden qutylýdyń amalyn izdeýde
ASTANA. QazAqparat - Italıandyq «Mılan» fýtbol klýbynyń basshylyǵy shabýylshy Marıo Balotellıdi satý jóninde sheshimge keldi. Bul týraly Corriere dello Sport habarlady.
Derek kóziniń aqparatynsha, «rossonerı» bul kelisimnen 30 mıllıon eýroǵa jýyq paıda tappaqshy. Bul qarajatty «Mılan» quramdy kúsheıtý úshin baǵyttamaq.
Sonymen qatar, Balotellımen qoshtasý klýbqa jalaqy turǵysynan únemdeýge jol ashady. Oıynshynyń jalaqysyna «Mılan» 11 mıllıon eýro jumsaıdy. Sheshimniń taǵy bir sebebi komandadaǵy ishki ahýaldy jaqsartý, óıtkeni bul oıynshy árdaıym ósektiń ortasynda júredi.
«Mılan» ókilderi Balotellıdi satý máselesin onyń agenti Mıno Raıolamen talqylaýda. 23 jastaǵy fýtbolshyny óz komandasyna qosýǵa nıet tanytqandardyń biri - «Monako». Osyǵan deıin BAQ ıtalıandyq fýtbolshyǵa aǵylshyndyq «Arsenal» men «Lıverpýl» qyzyǵýshylyq tanytqanyn jazǵan bolatyn.
Ótken maýsymda ıtalıandyq A serııasynda Balotellı 30 matchqa qatysyp, 14 gol soqqan.
