Mılad Karımı sporttyq gımnastıkadan Álem kýboginde eki kúmis aldy
NUR-SULTAN. QazAqparat - Búgin, 4 qazan kúni, sporttyq gımnastıkadan Vengrııadaǵy álem kýboginiń fınaldyq kezeńi ótti. Aqtyq syn qorytyndysy boıynsha Qazaqstan komandasy taǵy eki júldege qol jetkizdi, dep habarlaıdy QazAqparat Olympic.kz saıtyna silteme jasap.
Komanda múshesi Mılad Karımı tórt jattyǵý boıynsha fınalǵa shyǵyp, ekeýinde júldege ilikti. Atap aıtar bolsaq, Karımı qossyryqtaǵy jáne kermedegi jattyǵýda úzdikter qatarynan kórinip, ekinshi orynǵa taban tiredi. Ol bir kún buryn ótken erkin jattyǵýda jetinshi, qol tirep sekirýden altynshy nátıje kórsetken bolatyn.
Aıta ketelik, buǵan deıin Narıman Kýrbanov gımnastıkalyq at snarıadynda altyn alsa, Іlııas Azızov erkin jattyǵýda kúmiske qol jetkizdi.
