Mılad Karımı Qytaıda ótetin Azııa chempıonatyna qatyspaıdy
ASTANA. KAZINFORM – Qazaqstannyń erler quramasynyń kóshbasshylarynyń biri, sporttyq gımnastıka sheberi Mılad Karımı Qytaıdyń Tszýnı qalasynda ótetin Azııa chempıonatyn ótkizip alady. Bul týraly Ulttyq olımpıadalyq komıtettiń baspasóz qyzmeti málimdedi.
Bas bapker Aleksandr Kımniń aıtýynsha, sportshy jaraqatyna baılanysty jarysqa qatysa almaıdy.
– Mılad Karımı Beıjińdegi birlesken oqý-jattyǵý jıynynyń ekinshi aptasynyń basynda jaraqat aldy. Rentgen túsirgennen keıin keýde tusyndaǵy qabyrǵasynda jaryq bar ekeni anyqtaldy. Endi onyń tolyq qalpyna kelýi úshin birneshe apta qajet. Qatty aýyrsynýdy sezinbese de, biz sportshynyń densaýlyǵyna qaýip tóndirmeýdi jón kórip, onyń ornyna Nurtan Idrısovty qostyq. Sonymen qatar Qytaıǵa Emıl Ahmedjanovty shaqyrttyq. Ol qosalqy sportshy mártebesinde bolady. Árıne, bul jaǵdaı komandaǵa áser etti. Sebebi Mılad Azııa chempıonatynda Qytaı, Japonııa, Taıbeı jáne Fılıppın quramalarynyń álemdik deńgeıdegi kóshbasshylarymen básekege túse alatyn bizdiń jalǵyz gımnasymyz edi. Erteń jarys bastalady. Qurlyq birinshiliginiń biz úshin qalaı órbıtinin kóretin bolamyz, – dedi Aleksandr Kım.
Aıta keteıik, endi Qazaqstan quramasynyń quramy tómendegideı:
- Ilıas Azızov
- Dmıtrıı Patanın
- Roman Hegaı
- Dııas Toıshybek
- Nurtan Idrısov
- Emıl Ahmedjanov
Tszýnıdegi Azııa chempıonaty 18-21 maýsym aralyǵynda ótedi.
Aıta keteıik, Mıhaıl Shaıdorov Olımpıadadan keıingi maýsymyn Frantsııadaǵy Gran-prıden bastaıdy.
