Mılad Karımı Azııa chempıonatyndaǵy ekinshi júldesine qol jetkizdi
NUR-SULTAN. QazAqparat - Monǵolııa astanasy Ulan-Batyr qalasynda ótip jatqan sporttyq gımnastıkadan Azııa chempıonatynda qazaqstandyq atlet Mılad Karımı ekinshi júldesine qol jetkizdi, dep habarlaıdy QazAqparat.
Qazaqstandyq sportshy qol tirep sekirýden fınaldyq báseke qorytyndysy boıynsha 14.400 upaı enshilep, úzdik úshinshi oryndy ıelendi.
Bul saıys túrinen bas júldeni qytaılyq Mıngı Hýan jeńip alsa, ekinshi orynǵa ındonezııalyq atlet Mýhammad Aprızal jaıǵasty.
Eske sala keteıik, Mılad Karımı erkin jattyǵýdan ótken fınaldyq kezeńde 14.533 upaı enshilep, kúmis medal jeńip alǵanyn osyǵan deıin habarlaǵan bolatynbyz.
Endi ol taǵy eki jattyǵý boıynsha baq synaıdy. Atap aıtsaq, Karımı aldaǵy ýaqytta kerme men gımnastıkalyq qossyryqtan synǵa túsedi. Sonymen qatar, Narıman Kýrbanov pen Akım Mýsaev gımnastıkalyq at snarıadynda aqtyq synǵa joldama jeńip alǵan bolatyn.
