Myqty ınstıtýttar eldiń bolashaǵy úshin mańyzdy — halyqaralyq sarapshy
ASTANA. KAZINFORM — Halyqaralyq baıqaýshy, M. Boım atyndaǵy Azııa jáne jahandyq zertteýler ınstıtýty keńesiniń múshesi, Ortalyq Azııa boıynsha sarapshy Ejı Oledzkıı Qazaqstandaǵy Quryltaı depýtattarynyń saılaýyn uıymdastyrý deńgeıi men onyń ashyqtyǵyn atap ótti.
Onyń aıtýynsha, ol Qazaqstandaǵy eki saılaý ýchaskesine baryp, ondaǵy saılaý barysyna oń baǵa bergen.
— Protsess ashyq ári jaqsy uıymdastyrylǵan. Biz saılaý rásimderin erkin baqylaýǵa múmkindik aldyq. Saılaý komıssııalarynyń músheleri de óz mindetterin tıimdi atqaryp, daýys berý protsesine orynsyz aralasqan joq, — dedi Ejı Oledzkıı.
Ol ashyqtyq saılaý protsesine degen senimniń mańyzdy sharty ekenin atap ótti.
— Ashyqtyq senimdi qamtamasyz etedi, al senim demokratııalyq protsestiń mańyzdy bólikteriniń biri. Árıne, halyqaralyq baıqaýshylar retinde biz óte muqııat bolýymyz kerek. Eki saılaý ýchaskesi eldegi jalpy jaǵdaıdy kórsete almaıdy. Sondyqtan bizdiń qorytyndy baǵamyz keńirek baqylaýǵa negizdelýi tıis, — dedi sarapshy.
Sonymen qatar halyqaralyq baıqaýshy saılaý barysyn baqylaý kezinde alǵan áseriniń oń bolǵanyn aıtty.
— Ózim kórgen jaǵdaıǵa kelsem, áserim óte jaqsy. Bizdiń mindetimiz – saılaý barysyn baqylaý, kórgenimiz ben estigenimizdi táýelsiz baǵalap, naqty faktilerge súıene otyryp esep berý, — dedi halyqaralyq baıqaýshy.
Ejı Oledzkıı Qazaqstannyń óńirdegi strategııalyq mańyzyna da toqtaldy.
— Qazaqstan — Batys pen Shyǵysty, túrli mádenıetter men ekonomıkalyq óńirlerdi baılanystyratyn aımaqtaǵy mańyzdy memleket. Myqty ınstıtýttar memlekettiń bolashaqtaǵy damýy úshin mańyzdy ról atqarady, — dedi ol.
Sarapshynyń pikirinshe, saılaý osy protsestiń mańyzdy bóligi sanalady.
— Bul azamattardyń qatysýy, ashyqtyq týraly sóz. Eń bastysy — saılaý adamdardyń senimin qamtamasyz etedi, — dep atap ótti Ejı Oledzkıı.
Sondaı-aq ol Qazaqstannyń Ortalyq saılaý komıssııasyna ashyqtyǵy men halyqaralyq baıqaýshylarmen yntymaqtastyǵy úshin alǵys bildirdi.
— Ortalyq saılaý komıssııasynyń múshelerine ashyqtyǵy men yntymaqtastyǵy úshin, sondaı-aq Qazaqstanǵa halyqaralyq baıqaýshylardy qabyldap, osy protsesti baqylaýǵa múmkindik bergeni úshin alǵysymdy bildirgim keledi, — dep qorytyndylady sarapshy.
Buǵan deıin Máýlen Áshimbaev Memleket basshysynyń saıası reformalaryn iske asyrýǵa atsalysýdy jalǵastyratynyn aıtqan edi.
