Mıkronesıe qarajatynyń basym bóligi aýyldarǵa berilýde
ASTANA. QazAqparat - Memleket basshysy Nursultan Nazarbaevtyń tórtinshi áleýmettik bastamasy aıasynda shaǵyn nesıe berý baǵdarlamasynyń aýqymy keńeıip keledi, dep habarlaıdy QazAqparat Eńbek jáne halyqty áleýmettik qorǵaý mınıstrliginiń baspasóz qyzmetine silteme jasap.
Mınıstrliktiń málimetinshe, bıyl Memleket basshysynyń tórtinshi áleýmettik bastamasy aıasynda shaǵyn nesıe berý baǵdarlamasyn keńeıtýge basymdyq berilgen. Osy maqsatta 2018 jyly baǵdarlamany qarjylandyrý kólemi 20 mlrd teńgege kóbeıtilip, jalpy qarajat kólemi 62,6 mlrd teńgeni quraǵan. Onyń ishinde aýyldy jerlerde nesıe berýge 45,3 mlrd teńge, al qalalarda 17,3 mlrd teńge jumsalatyn bolady.
«Jalpy, jospar boıynsha 2018 jyly 14 myńnan astam adam mıkronesıemen (aýylda - 11 myń, qalalarda - 3 myń) qamtylady. Osy ýaqytqa deıin 8 492 mıkronesıe berilip, onyń 7 544-i aýyldarǵa, 948-i qalalarǵa bólingen.
«Bastaý-Bıznes» jobasy boıynsha 2018 jyly bıznesti júrgizýge 30 myń aýyl, shaǵyn jáne monoqalalardyń turǵyndaryn oqytý kózdelgen bolatyn. 1 qazandaǵy jaǵdaı boıynsha 21,6 myń adam nemese jospardyń 72 paıyzy kásipkerlik negizderin oqyp bitirdi», - dep habarlaıdy mınıstrliktiń baspasóz qyzmetinen.
