Mıkrokredıt uıymy jabylsa, qaryz joıyla ma
ASTANA. KAZINFORM — Mıkroqarjy uıymynyń (MQU) qyzmetin toqtatý qaryz alýshynyń mıkrokredıt berý týraly shart boıynsha mindettemelerin toqtatýdy bildirmeıdi, dep habarlaıdy Qarjy naryǵyn retteý jáne damytý agenttiginiń baspasóz qyzmeti.
Qaryzdy resimdeý kezinde qaryz alýshy alǵan aqshalaı qarajatty qaıtarýǵa jáne jasalǵan sharttyń talaptaryna sáıkes syıaqy tóleýge ózine mindetteme alady. Bul mindetteme MQU lıtsenzııasynan aıyrylǵan, ol taratylǵan nemese bankrot bolǵan jaǵdaıda da saqtalady.
MQU-ny lıtsenzııasynan aıyrý bereshektiń kúshin joımaıdy. Qaryz alýshynyń mindettemesi MQU-nyń ne mıkrokredıt berý týraly shart boıynsha quqyqtary (talaptary) belgilengen tártippen berilgen jańa kredıtordyń aldynda saqtalady.
Osylaısha, MQU-nyń qyzmetin toqtatýdyń ózi bereshekti toqtatý nemese esepten shyǵarý úshin negiz bolyp sanalmaıdy.
Mıkrokredıtti kim jáne qalaı óteıdi?
Eger shart boıynsha quqyqtar (talaptar) basqa kredıtorǵa berilmese, qaryz alýshy sharttyń talaptaryna sáıkes jáne onda kórsetilgen derektemeler boıynsha mindettemelerin oryndaýdy jalǵastyrady.
Eger bereshek basqa qarjy uıymyna nemese kollektorlyq agenttikke berilse jáne tólem derektemeleri ózgerse, qaryz alýshy kredıtordyń ózgergeni jáne mindettemelerdi oryndaý tártibi týraly tıisinshe habarlanýy kerek.
MQU-nyń jabylýy nemese lıtsenzııasynan aıyrylýy týraly aqparat negizinde ǵana tólemderdi toqtatýǵa bolmaıdy. Tólemdi júzege asyrmas buryn shart boıynsha talap etý quqyǵynyń kimge tıesili ekendigine jáne derektemelerdiń ózekti bolýyna kóz jetkizý qajet.
2026 jylǵy 1 qyrkúıektegi jaǵdaı boıynsha Qazaqstanda 217 MQU jumys isteıdi. 2026 jyldyń basynan bastap 8 MQU-nyń lıtsenzııasy keri qaıtaryldy, taǵy 2 lıtsenzııa toqtatyla turdy.
Qandaı jaǵdaılarda MQU-nyń lıtsenzııasy toqtatyla turýy nemese keri qaıtarylýy múmkin?
MQU-ny lıtsenzııasynan aıyrý nemese onyń qoldanylýyn toqtata turý úshin zańnama talaptaryn júıeli túrde buzý, sondaı-aq prýdentsııalyq jáne ózge de normatıvterdi saqtamaý negiz bolyp sanalady.
Mıkrokredıtti rásimdemes buryn MQU-nyń lıtsenzııasyn qalaı tekserýge bolady?
Mıkrokredıt almas buryn uıymnyń mıkroqarjylyq qyzmetti júzege asyrýǵa qoldanystaǵy lıtsenzııasy bar ekenine kóz jetkizý qajet. Lıtsenzııalanǵan MQU týraly aqparat agenttiktiń saıtynda qoljetimdi.
Aıta keteıik, MQU-men kelispeýshilikter týyndaǵan kezde qaryz alýshy mıkroqarjy ombýdsmanyna júgine alady. Qaryz alýshylar úshin mıkroqarjy ombýdsmanynyń qyzmetteri tegin.
Osydan buryn endi onlaın nesıe almas buryn 7 suraqqa jaýap berýge týra keletini týraly jazǵanbyz.
