Mıkroqarjylyq qyzmetti lıtsenzııalaý qorytyndysy shyǵaryldy
2021 jyldyń 1 qańtardan bastap Qazaqstanda mıkroqarjylyq qyzmetti lıtsenzııalaý iske qosyldy. MQU naryǵyn retteý banktik emes sektordaǵy táýekelderdi azaıtý, onyń ashyqtyǵyn arttyrý úshin jáne qarjylyq qyzmetterdi tutynýshylardyń quqyqtaryn qorǵaý úshin engizilgen bolatyn.
«1 sáýirdegi derekter boıynsha mıkroqarjylandyrý naryǵynyń 883 sýbektisi, onyń ishinde 178 mıkroqarjy uıymy (budan ári – MQU), 542 lombard jáne 163 kredıttik seriktestik Agenttiktiń mıkroqarjylyq qyzmetti júzege asyrýǵa lıtsenzııasyn aldy, - dep habarlady Agenttiktiń baspasóz qyzmeti.
Mıkroqarjylyq qyzmetti júzege asyrýǵa lıtsenzııasy bar uıymdardyń tizimi Agenttiktiń resmı saıtynda ornalastyrylǵan.
«Ótken jylǵy qarasha aıynda biz Mıkroqarjylyq qyzmetti lıtsenzııalaý qaǵıdalaryn bekittik. Qaǵıdalarda býhgalterlik esepti avtomattandyrýǵa, basshy qyzmetkerlerdiń minsiz iskerlik bedeli men biliktiligine, MQU qatysýshylarynda alynbaǵan nemese ótelmegen sottylyqtyń bolmaýyna, qylmystyq jolmen alynǵan kiristerdi zańdastyrýǵa qarsy is-qımyl salasyndaǵy aqparattyq júıege qosylýǵa qoıylatyn talaptar, úı-jaılardyń qaýipsizdik standarttary kózdeledi. Buǵan qosa, lıtsenzııalaý protsesin jeńildetý úshin belgilengen talaptarǵa sáıkestigin rastaıtyn qujattar men málimetter tizbesi anyqtaldy. Ýaqyt tyǵyzdyǵyn eskere otyryp, QNRDA Mıkroqarjylyq uıymdar qaýymdastyǵymen, Qazaqstan lombardtarynyń ulttyq lıgasymen jáne agroónerkásiptik keshenniń kredıttik seriktestikter qaýymdastyǵymen birlese otyryp, mıkrokredıtteý naryǵynyń qatysýshylaryna lıtsenzııalaýdyń barlyq kezeńderin túsindirý jumysyn júrgizdi. Ótinishterdi qaraý belgilengen merzimderdi saqtaı otyryp júrgizildi, lıtsenzıattarǵa qujattardy «elektrondyq úkimettiń» veb-portaly arqyly elektrondyq túrde, sondaı-aq keńse arqyly qaǵazdaǵy nusqada usyný múmkindigi berildi», - deıdi Agenttik tóraǵasynyń orynbasary Nurlan Ábdirahmanov.
MQU-nyń ornyqtylyǵyn, eń az standarttardy saqtaý úshin qarjylyq, tehnıkalyq quraldar men personaldyń bolýyn qamtamasyz etý úshin 2019 jylǵy qarashada MQU-nyń jarǵylyq jáne menshikti kapıtaldarynyń mólsherlerine talaptar belgilendi. Іs-árekettegi sýbektiler úshin kapıtaldardyń eń tómengi mánderin MQU úshin 30 mln teńgeden 100 mln teńgege deıin, kredıttik seriktestikter úshin 10 mln teńgeden 50 mln teńgege deıin, lombardtar úshin 10 mln teńgeden 70 mln teńgege deıin kezeń-kezeńimen 2023 jylǵa deıin arttyrý kózdelip otyr.
Bul rette, jańadan qurylatyn uıymdar jarǵylyq jáne menshikti kapıtaldaryn joǵarylatylǵan eń az mánderdiń deńgeıinde qalyptastyrýǵa tıis.
«Lıtsenzııalaýdy engizý mıkroqarjy naryǵy sýbektileriniń jyldyq tıimdi syıaqy mólsherlemesiniń shekti mánderin saqtaýyn baqylaýdy qamtamasyz etýge, olardyń zańsyz qyzmet jáne alaıaqtyq operatsııalar, qarjy pıramıdalarynyń shemalaryn júrgizýine jol bermeýge jáne osylaısha naryqtan josyqsyz uıymdardy shyǵaryp, tutynýshylardyń múddelerin qorǵaýǵa múmkindik beredi», - dedi Nurlan Ábdirahmanov.
Qarjy naryǵyn retteý jáne damytý agenttigine belgilengen merzimde lıtsenzııa alýǵa ótinish bildirmegen ne lıtsenzııa alýdan bas tartylǵan is-árekettegi mıkroqarjy naryǵynyń uıymdaryna qatysty sot tártibimen májbúrlep qaıta uıymdastyrý ne taratý jónindegi sharalar qabyldanatyn bolady.
