Mıkroqarjy uıymdarynan nesıe alýdyń talaptary qandaı
«Agenttik 2021 jyldan bastap mıkrokredıttermen alaıaqtyqty boldyrmaý maqsatynda tıisti qadaǵalaý sharalaryn qabyldady. 2021 jylǵy aqpanda Agenttik mıkroqarjy uıymdaryna (MQU) qatysty bıometrııalyq ıdentıfıkattaýsyz nemese elektrondyq tsıfrlyq qoltańbanyń kómegimen ıdentıfıkattaýsyz elektrondyq tásilmen mıkrokredıtter berýdi toqtatýǵa uıǵarym jasady. Buǵan qosymsha zardap shekken azamattardy qorǵaý úshin MQU alaıaqtyq tásilmen alynǵan mıkrokredıtter boıynsha syıaqy jáne aıypaqy esepteýdi toqtatty, sondaı-aq kredıttik bıýroǵa kredıttik tarıhtardy túzetý týraly aqparat jiberildi», - delingen Qarjy naryǵyn retteý jáne damytý agenttigi tóraǵasynyń depýtattar saýalyna bergen jaýabynda .
Onyń aıtýynsha, 2021 jylǵy naýryzda agenttik onlaın nesıe beretin barlyq MQU-ny klıentti naqty tekserýdi jáne ony rastaýdy, onyń derekterin ótinimde berilgen derektermen salystyryp tekserýdi, klıenttiń naqty bıometrııalyq derekteriniń jeke basyn kýálandyratyn qujattarda kórsetilgen derekterge sáıkes bolýyn qamtamasyz etýdi, sondaı-aq klıenttiń mıkrokredıt alýǵa óz erkin bildirýin tirkeýge mindettedi.
Mıkrokredıtterge qatysty alaıaqtyqqa jol bermeý úshin júıelik deńgeıde agenttik basqarmasynyń 30 sáýirdegi №63 qaýlysymen onlaın mıkrokredıtter berý kezinde qaryz alýshylardy ıdentıfıkattaýdyń jańa tártibi engizildi. Endi onlaın mıkrokredıt alý úshin qaryz alýshyny ıdentıfıkattaý tek elektrondyq tsıfrlyq qoltańba arqyly nemese QR Ulttyq banktiń QBEO RMQK SDAO servısin paıdalana otyryp, qaryz alýshynyń bıometrııalyq ólshemderine sáıkestigi, sondaı-aq naqty ýaqyt rejıminde qaryz alýshynyń jeke derekteri men beınesin eki faktorly tekserý arqyly júzege asyrylýy múmkin.
Mıkrokredıt berý qupııasyn quraıtyn aqparatqa zańsyz qol jetkizý, ony zańsyz ózgertý, úshinshi tulǵalar tarapynan zańsyz is-áreketterdi júzege asyrý anyqtalǵan jaǵdaıda, MQU eki jumys kúni ishinde osyndaı is-áreketterdiń sebepteri men saldarlaryn joıý úshin sharalar qabyldaýǵa mindetti.
Aıta keteıik, QR Qarjy naryǵyn retteý jáne damytý agenttiginiń tóraǵasy Mádına Ábilqasymovaǵa ınternet alaıaqtyqqa qatysty elimizdegi ahýaldy aıtty.
Budan buryn habarlanǵandaı, Parlament Májilisiniń birqatar depýtattary onlaın nesıe berýdegi alaıaqtyq áreketterdiń kóbeıýine alańdaýshylyq bildirdi. Osyǵan baılanysty bir top depýtat QR Qarjy naryǵyn retteý jáne damytý agenttiginiń tóraǵasy Mádına Ábilqasymovaǵa saýal joldady.