Mıkroqarjy uıymdary 28 myń boryshkerdiń bereshegin tolyq keshiredi

ASTANA. QazAqparat – Mıkroqarjy uıymdary 432 myń qaryz alýshynyń problemalyq bereshegin qaıta qurylymdaıdy. Bul týraly QR Qarjy naryǵyn retteý jáne damytý agenttigi tóraǵasynyń birinshi orynbasary Nurlan Ábdirahmanovtyń Májilis depýtattarynyń saýalyna bergen jaýabynda aıtylǵan, dep habarlaıdy QazAqparat tilshisi.

«Agenttik jyl basynda kepilsiz onlaın mıkrokredıt berý segmentindegi 30 mıkroqarjy uıymynan azamattardyń problemalyq mıkrokredıtterin tómendetý jónindegi jeke josparlaryn talap etti. Usynylǵan jeke josparlar aıasynda 2022 jyldyń sońyna deıin mıkroqarjy uıymdary 33,1 mlrd teńge somasyna 432 myń qaryz alýshynyń problemalyq bereshegin qaıta qurylymdaýdy, 0,8 mlrd teńge somasyna 107 myń qaryz alýshyny ishinara keshirý jáne 0,6 mlrd teńge somasyna 28 myń qaryz alýshyny tolyq keshirý josparlaǵan», - dedi Nurlan Ábdirahmanov.

Agenttik ókiliniń málimetinshe, 2022 jyldyń 1 qazanyna mıkroqarjy uıymdary 285,5 myń qaryz alýshyǵa qatysty problemalyq bereshekti tómendetý jónindegi is-sharalardy júzege asyrdy.

«Onyń ishinde negizgi borysh pen syıaqy boıynsha 66,4 myń qaryz alýshynyń 585 mln teńge bereshegi, 756 mln teńge turaqsyzdyq aıyby tolyq jáne ishinara keshirildi. 4,8 mln teńge mólsherinde turaqsyzdyq aıyby esepten shyǵaryla otyryp, 15,3 mlrd teńge somaǵa 219,9 myń boryshkerdiń mıkrokredıti qaıta qurylymdaldy. Agenttik jeke josparlardyń oryndalýyn baqylaýdy jalǵastyrady», - dedi Nurlan Ábdirahmanov.