Mıkroqarjy uıymynan bankke deıin: KMF bank lıtsenzııasyn aldy
ASTANA. KAZINFORM — Memleket basshysy sońǵy ýaqytta shaǵyn jáne orta bıznesti qoldaý sharalaryn kúsheıtý qajet dep jıi aıtyp júr. Kredıttik portfeliniń 94,6%-y kásipkerlik sýbektilerine tıesili KMF búgin resmı túrde bank lıtsenzııasyn aldy.
Atalǵan qarjy uıymy sonaý 1997 jyldan beri jumys istep kele jatyr jáne qarjy sektorynyń eń ornyqty qatysýshylarynyń biri. Ótken jyldyń qorytyndysy boıynsha uıym aktıvter, portfel kólemi jáne klıentter sany boıynsha Qazaqstannyń mıkroqarjy uıymdary arasynda birinshi oryndy ıelendi. Jumys istegen jyldary KMF aýqymdy óńirlik jeli qurdy jáne ózin áleýmettik baǵyttaǵy jáne qarjylyq turǵydan turaqty ınstıtýt retinde kórsetti.
— KMF aktıvteri 395 mlrd teńge. Kredıttik portfel jyl basynan beri 12,4%-ǵa ósip, 315 mlrd teńgeni qurady. Bul rette bızneske mıkrokredıtter portfeli 11,5%-ǵa, al jeke tulǵalardy kásipkerlik maqsattarǵa qarjylandyrý úsh ese, 172 mlrd teńgege deıin ósti. Sonymen qatar, KMF táýekelderge qatysty konservatıvti tásildi ustanady: 90 kúnnen asa keshiktirilgen qaryzdar bar bolǵany 5,7%-dy quraıdy, — dedi Qarjy naryǵyn retteý jáne damytý agenttiginiń tóraǵasy Madına Ábilqasymova
1963 jyldan beri álemniń 148 elinde damý baǵdarlamalaryn júzege asyryp kele jatqan amerıkalyq KMF-Demeý qory (60,4%) KMF-tiń negizgi aktsıoneri bop tabylady. Halyqty qarjylyq jáne bıznes saýattylyqqa úıretý sheńberinde KMF jáne KMF-Demeý qorynyń jobalary boıynsha 180 myńnan astam adam oqydy, onlaın-formatta 360 myń adam qamtyldy. Bıznestiń áleýmettik jaýapkershiligin damytýǵa qosqan eleýli úlesi úshin 2017 jyly KMF Microfinanza Rating (MFR) halyqaralyq agenttiginen «A» deńgeıinde áleýmettik reıtıng, al 2019 jyly áleýmettik áserdi tamasha basqarǵany jáne sondaı-aq áleýmettik mıssııany oryndaýdyń joǵary yqtımaldyǵy úshin «AA-» joǵary deńgeıin aldy.
— Shaǵyn jáne orta bıznesti, ásirese, óńirlerde kredıtteý úshin KMF sııaqty oıynshylardyń mańyzdylyǵyn túsine otyryp, 2022 jyly Agenttik zańnamalyq deńgeıde iri jáne qarjylyq ornyqty mıkroqarjy uıymdaryna tolyqqandy bankter bolyp qaıta qurylýǵa múmkindik berdi. Qaıta qurý tetigi bir jylǵa deıingi merzimge eseptelgen kezeń-kezeńmen jáne qurylymdyq aınaldyrý protsesin kózdeıdi. Bul tásil mıkroqarjy uıymdaryna bank qyzmetiniń jańa talaptary men standarttaryna — ınfraqurylym men IT-júıelerdi jańǵyrtýdan bastap korporatıvtik basqarý jáne táýekelderdi basqarý protsesterin qaıta qurýǵa deıin birtindep beıimdelýge múmkindik beredi, — dedi Madına Ábilqasymova.