Mıkroqarjylandyrý jáne kollektorlyq qyzmetterdi qadaǵalaýdyń eki deńgeıli júıesi engizilmek

ASTANA.KAZINFORM — Qazaqstanda mıkroqarjylandyrý jáne kollektorlyq qyzmetter sýbektilerin qadaǵalaýdyń eki deńgeıli júıesin engizilmek. Bul týraly Qarjy naryǵyn retteý jáne damytý agenttigi málimdedi.

Qazaqstan Respýblıkasynyń Qarjy naryǵyn retteý jáne damytý agenttigi mıkroqarjylandyrý jáne kollektorlyq qyzmetter salasynda ózin-ózi retteý ınstıtýtyn engizý bastamasyn talqylaý úshin dóńgelek ústel ótkizdi.

Іs-sharaǵa Agenttik basshylyǵy, Ulttyq Banktiń, Qazaqstan qarjygerleri qaýymdastyǵynyń, Reseı Bankiniń, mıkroqarjy uıymdarynyń, kollektorlyq agenttikterdiń ókilderi, sondaı-aq Reseı Federatsııasynyń ózin-ózi retteıtin uıymdarynyń (ÓRU) ókilderi qatysty.

Agenttiktiń dereginshe, búgingi kúni mıkroqarjylandyrý sektorynda 899 sýbekt jumys isteıdi. Kollektorlyq agenttikterdiń tiziliminde 197 uıym bar. A.j. 1 shildedegi jaǵdaı boıynsha uıymdardyń nesıe portfeli 3,2 trln teńgeni qurap, 2021 jyldan beri 2 eseden astam ósti. Bul rette nesıe portfeliniń 61%-y nemese 1,9 trln teńge bızneske mıkrokredıtterge tıesili.

Sonymen qatar, qarjylyq qyzmetterdi tutynýshylardyń shaǵymdary sanynyń ósýi baıqalady. Tutynýshylardyń quqyqtaryn qorǵaýdy qamtamasyz etý maqsatynda Agenttik mıkroqarjylandyrý jáne kollektorlyq qyzmetter sýbektilerine úzdiksiz qadaǵalaý júrgizedi. 2024 jyldan bastap qadaǵalaý sýbektilerine qatysty 812 jáne 730 qujattamalyq tekserý júrgizildi, onyń qorytyndysy boıynsha 140 qadaǵalaý sharasy qoldanyldy, 431 mln teńge somaǵa 1 175 aıyppul shyǵaryldy.

— Tekserý nátıjeleri buzýshylyqtar tek mıkrokredıtter berý máselelerimen ǵana emes, sonymen qatar olardyń qyzmetiniń basqa aspektilerimen baılanysty ekenin kórsetip otyr. Osyny eskere otyryp, Agenttik júıeli shara retinde mindetti ózin-ózi retteýdi belgileý jolymen mıkroqarjylandyrý jáne kollektorlyq qyzmetter sýbektilerin qadaǵalaýdyń eki deńgeıli júıesin engizýdi usynady, — dep habarlady Mádına Ábilqasymova.

Agenttiktiń Banktik emes uıymdardy retteý departamentiniń dırektory Nurjan Bıdaıbek Qazaqstanda ÓRU engizýdiń negizgi baǵyttary týraly baıandama jasap, halyqaralyq tájirıbe osy quraldyń naryqtaǵy ornyqtylyq pen tártipti qamtamasyz etýdegi tıimdiligin kórsetip otyrǵanyn atap ótti.

Dóńgelek ústel barysynda Reseı Federatsııasynyń tájirıbesi jan-jaqty qarastyryldy. Reseı Bankiniń ókilderi ÓRU engizýdiń barlyq aspektilerine egjeı-tegjeıli toqtaldy.

Jalpy alǵanda, kezdesýge qatysýshylar ÓRU ınstıtýtyn engizý jónindegi bastamany oń baǵalady jáne bul úshin mıkroqarjylandyrý jáne kollektorlyq qyzmetter naryǵynda barlyq qajetti jaǵdaılar bar ekenin atap ótti. Osy modeldi tabysty iske asyrý naryq sýbektileriniń tártibin arttyrady, kórsetiletin qyzmetterdiń sapasyn jaqsartady, sondaı-aq naryqty damytýǵa basa nazar aýdara otyryp, teńgerimdi retteýdi qalyptastyrýdy qamtamasyz etedi.

Kezdesý qorytyndysy boıynsha qatysýshylar ÓRU engizý tetikteri boıynsha birlesken jumysty jalǵastyrý qajettiligin atap ótip, yntymaqtastyqqa daıyn ekendikterin bildirdi.

Eske sala keteıik, buǵan deıin agenttik eger atyńyzǵa alaıaqtyq kredıt resimdelse, ne isteý keregin habarlaǵan bolatyn.