Mıkroqarjy uıymdarynyń jarnama jasaýyna tyıym sala almaımyz – Oljas Qızatov

ASTANA. KAZINFORM – Qarjy naryǵyn retteý jáne damytý agenttigi tóraǵasynyń orynbasary Oljas Qızatov Senat uıymdastyrǵan dóńgelek ústelden keıin mıkroqarjy uıymdarynyń «agressıvti» jarnamasy týraly pikir bildirdi.

- Jarnama joldaý – ár mıkroqarjy uıymynyń óz quqyǵy. «Sizder bizdiń mıkroqarjy uıymnan osyndaı nesıe ala alasyz» deıdi. Kredıt alý nemese almaý ár azamattyń óz erkinde. Alǵysy kelse, alady. «Olar jarnama retinde jiberedi, biz olardy qalaı shekteımiz, - dedi agenttik ókili.

Oljas Qızatov agenttiktiń ondaı quqyǵy joq ekenin aıtady.

- Kredıt alýǵa olardy májbúrlemeıdi ǵoı. Jaı usynysyn joldaıdy. Sharttaryna kelisse alady, kelispese almaıdy. Jarnama bererde shekteýge bizdiń quqyǵymyz joq, – dedi ol.

Buǵan deıin Qarjylyq monıtorıng agenttiginiń Qostanaı oblysyndaǵy departamenti turǵyndarǵa tıimsiz shartpen qaryz bergen mıkroqarjy uıymyn tekserip jatqany habarlanǵan bolatyn.