Mıkroqarjy uıymdaryna boryshkerlerge saǵat 21:00-den keıin qońyraý shalýǵa tyıym salynbaq

ASTANA. KAZINFORM – Qarjy naryǵyn retteý jáne damytý agenttigi mıkroqarjy uıymdarynyń boryshyn óteý merzimin keshiktirgen qaryz alýshylarmen ózara is-qımylyn naqty rettemek. Aagenttiktiń tıisti qaýly jobasy Ashyq NQA portalynda jarııalandy.

«Bank qyzmetterin kórsetý jáne bankterdiń, bank operatsııalarynyń jekelegen túrlerin júzege asyratyn uıymdardyń bank qyzmetterin usyný protsesinde týyndaıtyn klıentterdiń ótinishterin qaraýy qaǵıdalaryn bekitý týraly» Ulttyq bank qaýlysyna sáıkes, bank qyzmetkerleri boryshkerlerge 08:00-den 21:00-ge deıin ǵana qońyraý qala alady.

Agenttik dál osyndaı qaǵıdany mıkroqarjy uıymdaryna da qoldaný qajet dep esepteıdi.

«Mıkroqarjy uıymdary qyzmetkerleriniń negizsiz qońyraýlary saldarynan qarjylyq qyzmetterge tutynýshylar tarapynan narazylyq táýekelderin boldyrmaý maqsatynda joǵaryda atalǵan shekteýlerdi mıkroqarjy uıymdaryna da qoldaný qajet dep sanaımyz», - delingen qaýly jobasynda.

Sonymen qujatqa sáıkes, MQU qyzmetkeri jumys kúnderi saǵat 8:00-den 21:00-ge deıingi kezeńde qaryz alýshynyń turǵylyqty jeri ne ornalasqan jeri, ne qaryz alýshynyń tirkelgen jeri boıynsha ne uıymnyń (fılıaldyń) úı-jaıynda aptasyna úsh retten artyq emes jáne eger ózge ýaqyt, kezeńdilik jáne kún (demalys jáne (nemese) mereke) qaryz alýshymen kelisilmegen jáne shartta kózdelgen bolsa, jumys kúni bir retten artyq emes is-qımyl jasaıdy. 

Bul rette qońyraý shalýshy uıymnyń ataýyn; uıymnyń ornalasqan jerin; óziniń aty-jóni men laýazymyn; shartta kózdelgen bereshektiń, negizgi boryshtyń, syıaqynyń, komıssııalardyń, aıypaqynyń (aıyppuldyń, ósimpuldyń) merzimi ótken jáne aǵymdaǵy somalary qaldyǵynyń qurylymdaryn aıtýy qajet.

Qujat 19 qyrkúıekke deıin qoǵamdyq talqylaýǵa shyǵarylyp otyr.