Mıkro jáne shaǵyn bıznes tabysyn jasyryp, aqsha aınalymyn azaıtyp kórsetedi

ASTANA. QazAqparat - Qasym-Jomart Toqaev kásipkerlermen kezdesýde ádil salyq saıasatyn júrgizýdiń mańyzyna toqtaldy, dep habarlaıdy QazAqparat Aqordaǵa silteme jasap.

«Ekonomıkany yntalandyratyn ádil salyq saıasatyn júrgizý qajet. Salyq zańnamasynyń kúrdeliligi men turaqsyzdyǵyna bıznestiń shaǵymdanýy azaımaı tur. Bul ınvestorlardyń senimin azaıtyp, bızneske joq jerden másele týyndatady. Salyq organdary kásipkerlerdi jappaı sotqa tartyp jatyr. Atap aıtqanda, kelisimderdi jaramsyz dep taný jóninde talap-aryzdar kóp beriledi. Sottardyń júktemesi edáýir artty. Olarǵa salyqtyń durys tólenýin tekserý mindeti de júkteldi. Buǵan jol berýge bolmaıdy. Jaǵdaıdy túzeý úshin sharalar qajet. Úkimet jańa Salyq kodeksinde salyqtan jaltarýǵa qarsy is-qımyldyń tıimdi mehanızmin qarastyrýy qajet. Sondaı-aq taýarsyz operatsııalardy anyqtaýdyń naqty krıterıılerin anyqtaý kerek. Zańnama neǵurlym ońaı bolsa, ony qate túsiný yqtımaldyǵy da soǵurlym azaıady. Sondyqtan rásimderdi túbegeıli qysqartyp, ekiushty tujyrymdardy joıý qajet. Barlyq daýly jaǵdaı salyq tóleýshilerdiń paıdasyna qaraı túsindirilýi kerek», - deıdi Memleket basshysy.

Onyń aıtýynsha, eldegi salyqtyń 80 paıyzyn 260-qa jýyq kompanııa tóleıdi. Bul teńgerimsizdikti basqa salyq tóleýshilerdiń salyqtyq túsimin arttyrý arqyly túzetý kerek.

Sarapshylardyń baǵalaýyna sáıkes, elimizde jumyspen qamtylǵan jalpy halyqtyń tórt mıllıony tabysynan salyq tólemeıdi.

Jeńildetilgen salyq rejımi engizilgenine qaramastan, mıkro jáne shaǵyn bıznes sýbektileri tabysyn jasyryp, aqsha aınalymyn azaıtyp kórsetedi.

«Bıznes sýbektileriniń 70 paıyzǵa jýyǵy jeńildetilgen deklaratsııada 5 mıllıonnan az tabys kórsetip, osy rejım aıasyndaǵy túsimderdiń 6 paıyzyn ǵana tóleıdi. Sondyqtan salyq protsedýralaryn jeńildetip, halyqpen jáne bıznespen tıimdi qarym-qatynas jasaý arqyly belsendi salyq tóleýshilerdi kóbeıtý jańa salyq saıasatynyń negizgi maqsattarynyń biri bolýǵa tıis. Salyq tóleýden jaltarýdan, jergilikti baqylaýshy organdarmen til tabysyp, táýekelge barýdan góri salyq tóleý tıimdi ári ońaı bolýy kerek. Salyq zańnamasyn ózgertý jumystaryn sozbalańǵa salýǵa bolmaıdy», - dep atap ótti Prezıdent.