Mıkro jáne shaǵyn bıznes sýbektileri salyqtan 3 jylǵa bosatylady
NUR-SULTAN. QazAqparat - 2020 jyldan mıkro jáne shaǵyn bıznes sýbektileri tabysqa salynatyn salyqty tóleýden 3 jylǵa bosatylady. Bul týraly búgin Úkimet otyrysynda «Salyq jáne kedendik ákimshilendirý» taqyrybynda baıandama jasaǵan QR Premer-Mınıstriniń Birinshi orynbasary – Qarjy mınıstri Álıhan Smaıylov aıtty, dep habarlaıdy QazAqparat tilshisi.
«2020 jyldyń basynan bastap, arnaıy salyq rejımin qoldanatyn mıkro jáne shaǵyn bıznes sýbektileri tabysqa salynatyn salyqty tóleýden 3 jyldyq merzimge bosatylady. Jer qoınaýyn paıdalanýshylar, aktsızdik ónimderdi óndirýshiler, oıyn bıznesi, syrtqy ekonomıkalyq qyzmet qatysýshylary bosatylmaıdy», - dedi ol.
Birinshi vıtse-premerdiń atap ótýinshe, sonymen qatar shaǵyn jáne orta bıznes sýbektilerine 3 jyl merzimge tekserý júrgizýge moratorıı engiziledi. Kedendik tekserý, qarama-qarsy salyq tekserý, qylmystyq is aıasynda júrgizilip jatqan jáne salyq tóleýshiniń ótinishi boıynsha óziniń qyzmetine qatysty tekserýler alyp tastalynady.
«Conymen qatar mıkro jáne shaǵyn bıznes sýbektilerine onlaın-KKM jáne POS-termınaldardy mindetti túrde qoldanýdy, kirister men shyǵystar jeńildetilgen esebin kezeń-kezeńimen engizýdi, salyq eseptiligin usynýdy qamtamasyz etý qajet», - dedi Álıhan Smaıylov.
