Mıkkı Rýrk 100 myń dollardan astam qaıyrymdylyq kómekten bas tartty
ASTANA. KAZINFORM — Gollıvýd akteri Mıkkı Rýrk ınternet arqyly jınalǵan 100 myń dollardan astam qarjylaı kómekti qabyldaýdan bas tartty, dep habarlaıdy Kazinform menshikti tilshisi The New York Times basylymyna silteme jasap.
Bul qarajat akter Los-Andjelestegi úıinen jaldaý aqysyn tólemegeni úshin shyǵarylǵannan keıin jınalǵan edi.
73 jastaǵy akter Instagram paraqshasynda óziniń qarjylyq jaǵdaıy men turmysynyń kópshilik talqysyna túskeni ózin «qorlanǵandaı sezindirgenin» aıtty.
— Men eshqashan beıtanys adamdardan da, jankúıerlerden de, basqa bireýden de bir tsent suramas edim, — dep jazdy ol.
Mıkkı Rýrk turǵan úıdiń ıesi Erık Goldı jeltoqsan aıynyń sońynda Los-Andjeles okrýginiń Joǵarǵy sotyna aryz túsirip, akterdiń 59 100 dollar kóleminde jaldaý aqysy boıynsha qaryzy bar ekenin málimdegen.
Sot qujattaryna sáıkes, akterge qaryzdy óteý nemese úıden kóshý úshin úsh kún ýaqyt berilgen.
Akterdiń menedjeri Kımberlı Haıns Mıkkı Rýrk Beverlı-Groýv aýdanyndaǵy bul úıde shamamen 10 jyl turǵanyn, al jańa ıesiniń jyljymaıtyn múlikti 2024 jyly satyp alǵanyn aıtty.
Onyń sózinshe, akter jaldaý aqysyn ýaqytynda tólep kelgen, alaıda keıin sharttar tym qolaısyz bola bastaǵan. Úsh bólmeli úıdiń aı saıynǵy jaldaý aqysy 5 200 dollardan 7 000 dollarǵa deıin kóterilgen kórinedi.
Kımberlı Haıns senbi kúni Mıkkı Rýrk ózinen kómek surap habarlasqanyn, al kelesi kúni onyń keńsesi GoFundMe platformasynda paraqsha ashyp, sol arqyly 100 myń dollardan astam qarajat jınalǵanyn jetkizdi.
Alaıda akter bul qarjyny qabyldaýdan bas tartty. Qazirgi ýaqytta Mıkkı Rýrk Batys Gollıvýdtaǵy qonaqúıge kóshken. Aldaǵy kúnderi ol Los-Andjelestiń Koreı kvartalyndaǵy páterge qonystanýdy josparlap otyr.
Sot otyrysy sáýir aıyna belgilengen.
— Men Mıkkıge tántimin. Ol — óz ustanymynan taımaıtyn adam, eshkimniń kómegin, qaıyrymdylyǵyn nemese qoldaýyn qabyldamaıdy. Degenmen adamdar ony jaqsy kóretinin jáne onyń qazir qıyn jaǵdaıda ekenin de sezemin, — dedi Kımberlı Haıns.
Aıta keteıik, budan buryn 2025 jyldyń sońynda amerıkalyqtardyń jartysyna jýyǵy qarjylyq qıyndyq kórip otyrǵanyn jazǵanbyz.