Mıhaıldyń jeńisi myńdaǵan jastarymyzdy sportpen shuǵyldanýǵa jigerlendirdi — Toqaev
ASTANA. KAZINFORM — Búgin Memleket basshysy XXV Qysqy Olımpıada oıyndarynyń chempıony Mıhaıl Shaıdorovty marapattady. Qasym-Jomart Toqaev chempıonnyń bapkeri, áıgili sportshy, 1994 jylǵy Olımpıada jeńimpazy, álem chempıony Alekseı Ýrmanovqa ystyq yqylasyn bildirdi, dep habarlaıdy Aqordanyń baspasóz qyzmeti.
— Mánerlep syrǵanaý sportyndaǵy bilikti maman retinde eren jetistikterińizdi jalǵaıtyn laıyqty izbasar daıyndadyńyz. Sol úshin Sizge zor alǵys aıtamyn. Osynaý tamasha tabysqa salalyq mınıstrlik, federatsııa, sondaı-aq ataqty boksshymyz, jaqynda esimi Dúnıejúzilik boks dańqy zalyna jazylǵan Gennadıı Golovkın basqaratyn Ulttyq Olımpıada komıteti eleýli úles qosty. Otandastarymyz sporttyq básekeniń qıyndyqtaryn, ásirese, erkin baǵdarlamadan keıingi Mıhaıldyń kúrdeli jaǵdaıyn tebirenispen baqylap otyrdy. Biraq ol táýekelge baryp, jer-jahannyń basty baıraqty básekesindegi jeńisti julyp aldy. Bul da kezdeısoq emes. Ózine berilgen jalǵyz múmkindikti ekiniń biri sátti paıdalana almaıdy. Ádette jarysqa túskende «baq shaba ma, bap shaba ma» dep jatady. Biraq «eńbek — bárin de jeńbek» degen ulaǵatty da umytpaıyq. Mıhaıldyń jeńisi myńdaǵan jastarymyzdy sportpen shuǵyldanýǵa jigerlendirdi. Eńbek etseń, erik-jigeriń muqalmaı, batyl áreket qylsań, kez kelgen, tipti qol jetpesteı kórinetin armannyń ózi oryndalatynyna senimin kúsheıtti. Búginde elimizdegi myńdaǵan ul-qyz Mıhaıl Shaıdorovqa qyzyǵa qarap, elikteıdi, dańqty sportshy bolǵysy keledi. Demek elimizdiń ulandary álemdik sporttyń bıiginde jarqyraı kórinetin kún alda. Barsha Olımpıada chempıondarynyń aty álem sportynyń jylnamasyna jazylady, olardyń jetistikteri Lozannadaǵy Halyqaralyq Olımpıada komıtetiniń mýzeıinde tirkeledi. Endi túrli eldiń týrısteri Mıhaıl Shaıdorovtyń 2026 jylǵy Olımpıadadaǵy tamasha jeńisi týraly biletin bolady, — dedi Memleket basshysy.
Budan buryn habarlanǵandaı, jaqynda Mılan-Kortına Olımpıadasynyń chempıony Mıhaıl Shaıdorov elge oraldy.