Mıhaıl Shaıdorovtyń olımpıadalyq obrazy qalaı dúnıege keldi — dızaıner
ASTANA. KAZINFORM — Belgili qazaqstandyq dızaıner Sáken Jaqsybaev Jibek Joly radıosynyń efırinde mánerlep syrǵanaýshy Mıhaıl Shaıdorovtyń Olımpıadadaǵy tarıhı jeńisine arnap tigilgen kostıýmniń qalaı daıyndalǵany jáne onyń mańyzy týraly aıtyp berdi.
Shyǵarmashylyq seriktestiktiń bastaýy
Dızaıner men sportshynyń ortaq joly 2025 jyldyń jazynda bastalǵan. Mıhaıldyń muzdaǵy sheberligine tánti bolǵan Sáken Jaqsybaev oǵan birlesip jumys isteýge usynys tastaıdy.
— Mıhaıldyń bolashaǵy zor ekenin birden ańǵardym. Onyń talantyna degen qurmetimniń belgisi retinde sahnalyq beınesin jasap berý týraly ózine hat jazdym, — deıdi dızaıner.
Olardyń alǵashqy jobasy Almatyda ótken Denıs Tendi eske alý týrnırinen bastaldy. Ol kezde sportshy úshin altyn jippen zerlengen qysqa shapan ázirlengen bolatyn. Dál osy sátten bastap sportshy men dızaınerlik toptyń júıeli seriktestigine jol ashyldy.
Kostıýmniń máni men mazmuny
Bastapqyda halyqaralyq jarystarǵa arnalǵan kıim keıinirek Olımpıada talaptaryna saı tolyqtyrylyp, jetildirildi. Kostıým qoıylymnyń ishki mazmunyn ashyp, mýzykalyq ekpindi kúsheıtip jáne ulttyq rýhty pash etý úshin jasalǵan.
Dızaınerdiń aıtýynsha, kostıýmniń túster gammasy aspan tústes kógildir tústen qara túske aýysatyn ǵaryshtyq kontseptsııaǵa negizdelgen. Al Swarovski tastary men arnaıy jaryq effektileri muzdaǵy qımylǵa erekshe kórik qosqan.
— Mánerlep syrǵanaýda kostıým — qoıylymnyń ajyramas bóligi. Ol qımylǵa kedergi keltirmeı, kerisinshe, sezimdi eselep, kórermenge batyldyq pen ásemdiktiń tepe-teńdigin kórsetýi tıis, — dep atap ótti Sáken Jaqsybaev.
Qolónershilerdiń qajyrly eńbegi
Olımpıadalyq kıimdi daıyndaýǵa 2,5 aı ýaqyt ketken jáne barlyq jumys tehnıkanyń kómegimen emes tolyǵymen qolmen tigilip, ázirlengen. Ár detalǵa jeke sheber jaýap berdi: biri keste tikse, ekinshisi matany boıaýmen aınalysqan. Al tastarmen bezendirý jumysyn birtutas stıldi saqtaý úshin tek bir maman ǵana jasap shyqqan.
Bul protseste dızaınerlik ambıtsııa emes, sportshynyń jaılylyǵy aldyńǵy orynǵa qoıyldy.
— Biz úshin eń mańyzdysy — Mıhaıldyń ózin erkin sezinýi. Ol kostıýmdi tigý barysynda kásibı keńesterin berip, onyń muzdaǵy tehnıkalyq talaptary men ishki túısigin eskere otyryp jasaldy, — deıdi avtor.
Sonymen qatar Mıhaıl Shaıdorovtyń kostıýmin Vogue Italia jýrnaly joǵary baǵalaǵan edi.
Eske sala keteıik, Mıhaıl Shaıdorov araǵa 32 jyl salyp, el qorjynyna qysqy Olımpıada oıyndarynyń kezekti altyn júldesin syılady.