Mıhaıl Shaıdorovtyń kostıými Vogue Italia jýrnaly tarapynan joǵary baǵalandy

ASTANA. KAZINFORM – Vogue Italia jýrnalynyń ǵalamtor betindegi nusqasy 2026 jylǵy Olımpıada oıyndaryn eń sándi jarystardyń qataryna qosyp, sportshylardyń eń qyzyqty kıim úlgisine arnaıy sholý jasady. Bul týraly QR Ulttyq Olımpıada komıteti málimdedi.

Tańdaýly tizimge erekshe dızaınymen, aıryqsha tústerimen jáne stıldik ereksheligimen kózge túsken sporttyq kıimder endi. Avtorlar tek kıim úlgilerine ǵana emes, sonymen qatar aksessýarlarǵa da aıryqsha nazar aýdarǵan.

Atalǵan sholýda qazaqstandyq mánerlep syrǵanaýshy Mıhaıl Shaıdorovtyń qysqa baǵdarlamada kıgen jarys kostıými de joǵary baǵalandy.

– Qazaqstan quramasynyń ókili Mıhaıl Shaıdorov kórermendi «Dıýna» fılmindegi Tımotı Shalame beınesin eske túsiretin kıim úlgisimen tańǵaldyrdy. Matanyń drapırovkasy men gradıentti elementteri kostıýmniń basqa bólikterimen úılesip, Denı Vılnev fılmderine tán apokalıptıkalyq ári fýtýrıstik álem estetıkasyna ıshara etedi, - delingen maqalada.

Shaıdorovtan bólek, Vogue Italia sholýyna ózge de mánerlep syrǵanaýshylardyń kostıýmderi endi. Atap aıtqanda: Ilıa Malının (AQSh, qysqa baǵdarlama), Petr Gýmennık (Reseı, qysqa baǵdarlama), Medıson Chok / Evan Beıts juby (AQSh, erkin bı), Stıven Gogolev (Kanada, qysqa baǵdarlama), Lara Nakı Gýtmann (Italııa, qysqa baǵdarlama) jáne Lorans Fýrne Bodrı / Gııom Sızeron juby (Frantsııa, rıtmıkalyq bı).

Vogue Italia atap ótken basqa sport túrlerindegi atletterdiń kıim úlgisimen siltemege ótý arqyly tolyq tanysa alasyz. Sondaı-aq «unady/unamady» batyrmasyn basý arqyly tikeleı daýys berýge bolady.

Aıta keteıik, Italııada ótip jatqan XXV qysqy Olımpıada oıyndarynda qazaqstandyq mánerlep syrǵanaýshy Mıhaıl Shaıdorov qysqa baǵdarlama qorytyndysy boıynsha besinshi orynǵa taban tiredi. Konkımen mánerlep syrǵanaýdan ulttyq qurama basshysy Aıza Mámbekova sportshynyń kórsetkishi men erkin baǵdarlamadaǵy basty basymdyqtary týraly aıtyp berdi.