El namysyn qorǵaǵan 36 sportshynyń 10-y alǵashqy ondyqqa endi — mınıstr
ASTANA. KAZINFORM — Qalyń jankúıer Italııadan tarıhı jeńispen oralǵan Mıhaıl Shaıdorovty Astana halyqaralyq áýejaıynda zor qurmet-qoshemetpen kútip aldy.
Saltanatty qarsy alý rásiminde sóz alǵan QR Týrızm jáne sport mınıstri Erbol Myrzabosynov sportshynyń Olımpıada chempıony atanýyna úles qosqan ata-anasyna, jattyqtyrýshylaryna, dárigerlerine jáne basqa da mamandarǵa alǵys aıtty.
— Mundaı úlken jeńis balalardyń sportqa degen yntasyn oıatady. Mıhaıldyń Olımpıada chempıony atanýy kóptegen ul-qyzymyzdyń jolyn ashady dep senemin. Jalpy, qysqy Olımpıadaǵa qatysqan barlyq sportshymyzǵa rahmet aıtamyn. Elimizdiń namysyn qorǵaǵan 36 sportshynyń 10-y jaqsy óner kórsetip, alǵashqy ondyqqa endi, — dedi mınıstr.
Іs-sharada QR UOK prezıdenti Gennadıı Golovkın de jyly lebizin bildirdi.
— Elińe medalmen oralýdyń qandaı bolatynyn men jaqsy bilemin. Qyz-jigitter jarady. Eń aldymen, chempıondarymyzdyń bapkerlerin, otbasyn quttyqtaımyn. Óıtkeni, olar árdaıym sportshylardyń janynan tabylyp, qoldaý bildirdi. Sport salasyndaǵy mamandar — mınıstrlik, federatsııa, Ulttyq olımpıada komıtetiniń qyzmetkerleri — bári de osy jeńiske úles qosty. Bizde endi konkımen mánerlep syrǵanaýdan Olımpıadanyń altyn medali bar. Qazaqstan buǵan ábden laıyq. Maqtan tutaıyq. Olar bizdiń jańa qaharmandarymyz, — dedi G. Golovkın.
Al Qazaqstandyq konkımen mánerlep syrǵanaý odaǵynyń prezıdenti Baýyrjan Eraly demeýshilerdiń atynan Astanadan Mıhaıl Shaıdorovqa úsh bólmeli páter sertıfıkatyn tabystady. Osyndaı qurmet mánerlep syrǵanaýdan Qazaqstan quramasynyń bas bapkeri Ásem Qasanovaǵa jáne alǵashqy ondyqqa engen mánerlep syrǵanaýshy Sofıa Samodelkınaǵa kórsetildi. Olarǵa bir bólmeli páter sertıfıkaty berildi.
Aıta keteıik, buǵan deıin Mıhaıl Shaıdorov qysqy Olımpıadanyń jabylý saltanatynda Qazaqstan týyn ustap shyqqanyn jazǵanbyz.