Mıhaıl Shaıdorovqa portreti beınelengen kilem syıǵa berildi
ALMATY. KAZINFORM — Mánerlep syrǵanaýdan qysqy Olımpıada oıyndarynyń chempıony Mıhaıl Shaıdorov Almatyǵa kelgende erekshe syılyqqa ıe boldy. Oǵan óz portreti salynǵan kilem tartý etildi.
Ońtústik astananyń halyqaralyq áýejaıynda saltanatty túrde qarsy alý rásimi kezinde Assol laqap atymen jumys isteıtin tanymal qazaqstandyq sýretshi Ásel Sabyrjanqyzy sportshyǵa óner týyndysyn syıǵa tartty.
Buǵan deıin sýretshi bul portretti jasaý barysyn áleýmettik jelidegi paraqshasynda kórsetken bolatyn.
Aıta keteıik, Mıhaıl Shaıdorov Almatyǵa ushyp keldi. Almatylyqtar ony zor qoshemetpen qarsy aldy. Olardyń arasynda qala ákimdiginiń ókilderi, sondaı-aq sportshynyń otbasy men dostary boldy.
Olımpıada chempıony týǵan jerge jetkendegi qýanyshyn bildirip, jyly lebiz ben qoldaý kórsetken otandastaryna alǵys bildirdi.
Mıhaıl Shaıdorov qysqy Olımpıada oıyndarynda altyn júldeni jeńip aldy. Ol Italııanyń Mılan jáne Kortına-d’Ampetstso qalalarynda ótken XXV qysqy Olımpıada oıyndarynyń erler arasynda mánerlep syrǵanaýdan qysqa baǵdarlamada 92.94 upaı, erkin baǵdarlamada 198.64 upaı — jalpy 291.58 upaı jınady.
25 aqpan kúni álemdik dodada kók týymyzdy jelbiretken otandasymyz Mıhaıl Shaıdorov elordaǵa ushyp keldi.
Keıin Aqorda rezıdentsııasynda HHV Qysqy Olımpıada oıyndarynyń jeńimpazy Mıhaıl Shaıdorov pen onyń jattyqtyrýshylaryn marapattaý rásimi ótti. Prezıdent XXV Qysqy Olımpıada oıyndaryndaǵy jetistikteri úshin Mıhaıl Shaıdorovty ІІ dárejeli «Barys» ordenimen, bapkeri, jattyqtyrýshy-keńesshi Alekseı Ýrmanovty ІІ dárejeli «Dostyq» ordenimen marapattady.