Mıhaıl Shaıdorov: Olımpıada altynymen shektelmeımin, aldymda uzaq jol bar

ASTANA. KAZINFORM — Búgin Memleket basshysy XXV Qysqy Olımpıada oıyndarynyń chempıony Mıhaıl Shaıdorovty marapattady. Óz kezeginde Olımpıada chempıony Mıhaıl Shaıdorov kórsetken qoldaýy úshin Qasym-Jomart Toqaevqa jáne barsha otandasymyzǵa rızashylyǵyn bildirdi, dep habarlaıdy Aqordanyń baspasóz qyzmeti.

Mıhaıl Shaıdorovtyń sózinshe, altyn medal — onyń ǵana emes, ata-anasynyń, bapkerleriniń jáne sportshy úshin alańdap, qoldaý kórsetken barsha qazaqstandyqtyń jeńisi. Ol Olımpıada altynymen shektelmeıtinin atap ótti.

— Qurmetti Qasym-Jomart Kemeluly! Bul kezdesýge Olımpıada chempıony retinde qatysý — men úshin zor mártebe. Altyn medal — meniń ǵana emes, ata-anamnyń, bapkerlerimniń jáne men úshin alańdap, qoldaý kórsetken barsha qazaqstandyqtyń jeńisi. Bul aıanbaı ter tógip jumys isteseń, jaqyn jandardyń mahabbaty men senimi bolsa, armandardyń oryndalatynyn kórsetedi. Prezıdent myrza, Sizdiń qoldaýyńyzdyń arqasynda sportshylar úlken jetistikterge, jańa tarıhı rekordtarǵa qol jetkizip júr. Men Olımpıada altynymen shektelmeımin. Aldymda uzaq jol bar. Elimniń senimin aqtap, jas urpaqqa úlgi bolyp, halqymyzdyń mereıin ústem etkim keledi. Rahmet Sizge! Súıikti Otanyma, Qazaqstanyma qyzmet etemin, — dedi Mıhaıl Shaıdorov.

Osyǵan deıin Qasym-Jomart Toqaev chempıonnyń bapkeri, áıgili sportshy, 1994 jylǵy Olımpıada jeńimpazy, álem chempıony Alekseı Ýrmanovqa ystyq yqylasyn bildirdi.