Mıhaıl Shaıdorov Memleket basshysy men barsha qazaqstandyqtarǵa rızashylyǵyn jetkizdi
ASTANA. KAZINFORM - Mánerlep syrǵanaýdan 2026 jylǵy qysqy Olımpıada chempıony Mıhaıl Shaıdorov ózine qoldaý bildirgen barsha qazaqstandyq azamattaryna alǵysyn bildirdi.
Otandasymyz Italııanyń Mılan jáne Kortına-d’Ampetstso qalalarynda ótip jatqan XXV qysqy Olımpıada oıyndarynyń erler arasynda mánerlep syrǵanaýdan jeńis tuǵyryna kóterildi.
Bul jóninde sportshy óziniń áleýmettik jelidegi paraqshasynda beınejazba jarııalady.
- Qurmetti dostar! Sizderge Mılannan sálem joldaımyn. Maǵan qoldaý bildirgen barsha otandastaryma rızashylyǵymdy jetkizgim keledi. Sondaı-aq bizdiń daıyndyǵymyzǵa erekshe qoldaý kórsetken Memleket basshysyna alǵys aıtamyn. Elimizdiń mánerlep syrǵanaý federatsııasynyń prezıdenti Baýyrjan Eralyǵa keıingi jyldary atalǵan sporttyń damýyna sińirgen eńbegi úshin raqmet aıtamyn. Shyn júrekten jarysqa daıyndyq barysynda jaýapty jáne aýyr kezeńde qasymda bolǵan mamandar men bapkerlerge rızashylyǵymyz sheksiz. Meniń jarysqa qatysýym barysynda trıbýna jáne kógildir ekran arqyly qoldaý kórsetken barsha qazaqstandyqtar men jankúıerlerge rızashylyǵymdy jetkizgim keledi. Sondaı-aq maǵan áleýmettik jeli arqyly qoldaý bildirgen azamattar az bolǵan joq, - dedi Mıhaıl Shaıdorov.
Mıhaııl Shaıdorov 2004 jyly 25 maýsymda Almaty qalasynda dúnıege kelgen. Otandasymyz 2022 jyly jasóspirimder álem chempıonatynda kúmis aldy.
Ol úshin ótken jyl tabysty boldy. AQSh-tyń Boston qalasynda eresekter arasyndaǵy álem chempıonatynda kúmis alsa, tórt qurlyq chempıonatynda jeńis tuǵyrynan kórindi. Al Harbındegi Azııa oıyndarynda otandasymyz úzdik úshtikti túıindedi.