Mıhaıl Shaıdorov kimdi úlgi tutatynyn aıtty
ASTANA. KAZINFORM – Qazaqstannyń olımpıada chempıony Mıhaıl Shaıdorov Instagram jelisinde oqyrmandarymen suraq-jaýap ótkizip, óziniń sporttaǵy basty kýmırin atady, dep habarlaıdy informsports.kz.
Jankúıerlerdiń biri oǵan «Who is your Idol?» («Sizdiń kýmırińiz kim?») degen suraq qoıǵan. Buǵan jaýap retinde Shaıdorov qazaqstandyq boks ańyzy Gennadıı Golovkınniń resmı paraqshasyn belgilep, «the greatest of all time» («barlyq ýaqyttyń eń uly sportshysy») dep jazdy.
Sondaı-aq ol jarııalanymyna Gennadıı Golovkınmen birge túsken estelik sýretin qosa bólisti.
Shaıdorov 2026 jyly Qazaqstan tarıhynda mánerlep syrǵanaýdan tuńǵysh Olımpıada chempıony atanyp, eldiń qysqy Olımpıada oıyndaryndaǵy ekinshi altyn júldegeri boldy. Buǵan deıin bul jetistikke tek shańǵyshy Vladımır Smırnov qol jetkizgen edi.
Budan bólek, Mıhaıl Shaıdorovtyń qorjynynda álem chempıonatynyń kúmisi, Tórt qurlyq chempıonatynyń altyny, 2025 jylǵy Azııa oıyndarynyń qolasy, Qazaqstan chempıonatynyń bes altyn medali jáne jasóspirimder arasyndaǵy álem chempıonatynyń kúmisi bar.
Al Gennadıı Golovkın áýesqoı boksta álem chempıony atanyp, Olımpıadanyń kúmis júldesin jeńip alǵan. Kásipqoı rıngte WBA, WBC, IBF jáne IBO tujyrymdary boıynsha álem chempıony boldy. Qazir ol Qazaqstan Ulttyq Olımpıada komıtetiniń prezıdenti jáne World Boxing uıymynyń basshysy qyzmetin atqarady.
Shaıdorovtyń kelesi kópshilik aldyndaǵy óner kórsetýi 9 tamyzda Frantsııanyń Anje qalasynda ótetin L’Art du Patinage muz shoýynda bolady. Al 2026/27 maýsymynda ol ISU Gran-prı serııasynyń Frantsııa jáne Qytaı kezeńderine qatysady.
