Mıhaıl Shaıdorov Qytaıdaǵy Gran-prı kezeńinde medalsiz qaldy
ASTANA. KAZINFORM — Mánerlep syrǵanaýdan Qazaqstannyń Olımpıada chempıony Mıhaıl Shaıdorov Qytaıdyń Shenchjen qalasynda ótken ISU Gran-prıiniń úshinshi kezeńinde júldegerler qataryna ilige almady, dep jazdy Іnformsports.kz.
Jarystyń qorytyndy kúninde, 8 qarashada otandasymyz erkin baǵdarlamada 168,62 upaı jınap, 12 qatysýshynyń ishinde 6-shy nátıje kórsetti. Al qysqa baǵdarlamada 94,87 upaımen 5-orynǵa jaıǵasqan bolatyn. Eki baǵdarlamanyń qorytyndysy boıynsha Shaıdorov 263,49 upaımen jalpy esepte 5-oryndy ıelendi jáne úzdik úshtikten 18,13 upaı qalyp qoıdy.
Mıhaıl óz baǵdarlamasynda tórttik flıpti sátti oryndaǵanymen, basqa kúrdeli elementterde qatelik jiberdi. Tóreshiler onyń tórttik lýtts sekirisinde burylystyń jetpeı qalǵanyn tirkep, eki tórttik sekirisi bar kaskad úshin de baǵany aıtarlyqtaı tómendetti.
Qytaıdaǵy kezeńde japonııalyq Kao Miýra (293,25) altyn alsa, reseılikter Vladıslav Dıkıdjı (282,44) kúmis, Evgenıı Semenenko (281,62) qola júldeni enshiledi. Shaıdorov buǵan deıin Frantsııadaǵy kezeńde 10-oryn alǵan edi.
Aıta keteıik, ol osy týrnırde 2024 jyly kúmis, al 2025 jyly qola medal ıelengen bolatyn.
Budan buryn habarlaǵanymyzdaı, Shaıdorov Qytaıdaǵy Gran-prı kezeńiniń qysqa baǵdarlamasynda 5-oryn aldy.
