Mıhaıl Shaıdorov ISU syılyǵyna usynyldy
ASTANA. KAZINFORM – Halyqaralyq konkıshiler odaǵy (ISU) 2026 jylǵy ISU mánerlep syrǵanaý júldesine úmitkerler tizimin jarııalady.
«Úzdik kostıým» nomınatsııasyna qazaqstandyq Olımpıada chempıony Mıhaıl Shaıdorov usynyldy. Ol sahnalyq obrazymen jáne baǵdarlamalyq kostıýmderindegi detaldarǵa erekshe mán berýimen erekshelenip otyr.
Marapattaý rásimi 29 naýryzda Pragada ótedi jáne Skating ISU YouTube arnasynda tikeleı efırde kórsetiledi. Kórermender 4 nomınatsııa boıynsha («Úzdik kostıým», «Eń áserli baǵdarlama», «Úzdik horeograf» jáne «Úzdik jattyqtyrýshy») daýys bere alady. Ár nomınatsııaǵa bir daýys berý múmkindigi bar.
Halyqaralyq konkıshiler odaǵy (ISU) 2020 jyldan beri jyl saıyn mánerlep syrǵanaý salasyndaǵy aıryqsha jetistikterge erekshe nazar aýdaryp keledi. Atalǵan is-shara sportshylardyń, jattyqtyrýshylardyń, horeograftardyń jáne kostıým dızaınerleriniń eńbegin eskerýsiz qaldyrmaý maqsatynda uıymdastyrylyp júr. Alǵashqy saltanatty shara pandemııaǵa baılanysty onlaın formatta ótti jáne ony Olımpıada men álem chempıondary Tanıt pen Charlı Ýaıt júrgizdi. Marapat ıeleri qatarynda Kýrt Braýnıng, Tara Lıpınskı, Djonnı Ýeır jáne telejúrgizýshi Elma Smıt sııaqty mánerlep syrǵanaý sheberleri boldy.
Mıhaıl Shaıdorov «Úzdik kostıým» nomınatsııasynda ISU syılyǵyna usynylǵan alǵashqy qazaqstandyq mánerlep syrǵanaýshy atanyp otyr. Bul syılyq mánerlep syrǵanaý salasyndaǵy eń bedeldi marapattardyń biri sanalady jáne sporttyq nátıjeler men kórkemdik sheberlikti biriktiredi.
Osyǵan deıin álemge tanymal ánshi Dımash Qudaıbergenniń mánerlep syrǵanaýdan Olımpıada chempıony Mıhaıl Shaıdorovqa avtokóliktiń kiltin tabystaǵanyn jazǵanbyz.