Mıhaıl Shaıdorov: Denıs Ten elimizdiń mánerlep syrǵanaý sportyna úlken úles qosty
MILAN. KAZINFORM — Mánerlep syrǵanaýdan 2026 jylǵy qysqy Olımpıada oıyndarynyń chempıony Mıhaıl Shaıdorov jeńis jolynyń ońaı bolmaǵanyn aıtty.
Sportshy osy maýsym asa aýyr bolǵanyn, Olımpıada oıyndary úshin uzaq daıyndalǵanyn jasyrmady.
— Maýsym boıy óz-ózimmen kúrestim. Jarystarda bes birdeı tórttik sekirýdi shamamen úsh ret oryndap kórýge tyrystym, biraq birde-bir ret sátti shyqpady. Al búgin bári sátti oryndaldy. Sáti túsip, qolymnan keldi. Olımpıadaǵa uzaq daıyndaldym. Maýsym boıy bar oıym — óz isimdi adal atqarý boldy. Endi eńbegimniń jemisin kórip otyrmyn. Bul medaldi Qazaqstan halqyna arnaımyn, — dedi ol.
Sonymen qatar M.Shaıdorov Denıs Tenniń elimizde mánerlep syrǵanaý sportynyń damýyna qosqan úlesin atap ótti.
— Qazaqstanda mánerlep syrǵanaýdyń damyǵanyn qalaımyn. Meniń medalim Denıs Ten úshin de mańyzdy bolar edi dep oılaımyn. Ol bizge jol ashty. Onyń da joly ońaı bolǵan joq, meniki de jeńil bolmady. Elimizdegi mánerlep syrǵanaý sportynyń damýyna qosqan úlesi úshin Denıske alǵys aıtamyn, — dedi Olımpıada chempıony.
Osyǵan deıin habarlaǵanymyzdaı, Mıhaıl Shaıdorov araǵa 32 jyl salyp, el qorjynyna qysqy Olımpıada oıyndarynyń kezekti altyn júldesin syılady.