Mıhaıl Shaıdorov Almatyǵa ushyp keldi
ALMATY. KAZINFORM – Italııada ótken qysqy Olımpıada oıyndarynyń chempıony Mıhaıl Shaıdorov Almatyǵa ushyp keldi.
Almaty jurty sportshyny qala áýejaıynda ystyq yqylaspen kútip aldy. Túngi ýaqytqa qaramastan áýe aılaǵynyń halyqaralyq termınalynda Mıhaıl Shaıdorovty kútken jurttyń qarasy qalyń boldy. Chempıondy qarsy alýǵa qala ákimdiginiń ókilderi, onyń týǵan-týystary men jankúıerleri arnaıy keldi.
Tarıhı júldeniń ıegeri týǵan qalasynyń turǵyndaryna alǵys aıtyp, olardyń qoldaýyn erekshe sezingenin atap ótti.
- Úıge jettim-aý! Týyp ósken qalama, qazir jáne bolashaqta turatyn qalama kelgenime qýanyshtymyn. Týǵan jerińde osyndaı jyly lebizdi seziný - qandaı sezim ekenin sózben aıtyp jetkizý múmkin emes. Árdaıym qoldaý bildirgen sizderge alǵys bildiremin, - dedi Mıhaıl Shaıdorov.
Ol ári qaraı da halyqaralyq jarystarǵa qatysyp, joǵary jetistikterge jetýge tyrysatynyn atap ótti. Sondaı-aq elimizde mánerlep syrǵanaýdy dáriptep, onyń damýyna atsalysýdy josparlap otyrǵanyn aıtty.
Saltanatty rásim barysynda tanymal qazaqstandyq sýretshi Ásel Sabyrjanqyzy Mıhaıl Shaıdorovqa kilemge salynǵan portretin syıǵa tartty.
Eske salaıyq, Italııanyń Mılan jáne Kortına-d’Ampetstso qalalarynda ótken XXV qysqy Olımpıada oıyndarynyń erler arasynda mánerlep syrǵanaýdan Mıhaıl Shaıdorov qysqa baǵdarlamada 92.94 upaı, erkin baǵdarlamada 198.64 upaı - jalpy 291.58 upaımen jınap, altyn júldeni jeńip aldy.
25 aqpan kúni álemdik dodada kók týymyzdy jelbiretken otandasymyz Mıhaıl Shaıdorov elordaǵa ushyp keldi.
Keıin Aqorda rezıdentsııasynda HHV Qysqy Olımpıada oıyndarynyń jeńimpazy Mıhaıl Shaıdorov pen onyń jattyqtyrýshylaryn marapattaý rásimi ótti. Prezıdent XXV Qysqy Olımpıada oıyndaryndaǵy jetistikteri úshin Mıhaıl Shaıdorovty ІІ dárejeli «Barys» ordenimen, bapkeri, jattyqtyrýshy-keńesshi Alekseı Ýrmanovty ІІ dárejeli «Dostyq» ordenimen marapattady.