Mıhaıl Rojkov «Astana» fýtbol klýbynyń 2012 jylǵy eń úzdik qorǵaýshysy
ALMATY. 13 jeltoqsan. QazAqparat - «Astana» fýtbol klýby saıtynyń jankúıerler arasynda 2012 jylǵy úzdik qorǵaýshyǵa daýys berý saýalnamasy aıaqtaldy. Onyń qorytyndysy boıynsha 30,08 paıyz daýys jınaǵan Mıhaıl Rojkov eń úzdik dep tanyldy.
Odan keıingi oryndardy komanda kapıtany Qaırat Nurdáýletov (27,07 paıyz) pen Vıktor Dmıtrıenko (23,68 paıyz) ıelendi. Jalpy «Astananyń» tas-qamal qorǵaýshysy qazir komanda quramynda oıynǵa qatysý jaǵynan da M.Rojkovtan keıingi úshinshi orynda kele jatyr. Eger bul tizimde 107 oıynmen kósh bastap kele jatqan Marat Shahmetovtyń 2009 jyldan beri óner kórsetip kele jatqanyn eskersek, komandaǵa odan 1 jyl keıin kelgen Mıhaıl men Qaırat úshin bul úlken jetistik. Ásirese, komanda kapıtany Q. Nurdáýletovtiń bul maýsymda kóktemde alǵan jaraqatynan keıin alańǵa 23 sáýirde ǵana oralǵanyn aıta ketken jón shyǵar. Jaraqatynan tolyq aıyqpaı jatyp, 22 sáýirde Qostanaıdyń «Tobyl» komandasymen syrt alańda bolǵan oıynda óz komandasyn alǵa súıregen ol 37-shi mınýtta jaraqatyna baılanysty óz ornyn bosatýǵa májbúr bolǵan kezde tablodaǵy esepte 0:2 esebimen astanalyqtar basym túsip turǵan. Alaıda tas-qamal qorǵaýshynyń joqtyǵyn paıdalanǵan qostanaılyqtar odan keıin esepti teńestirip qana qoımaı, 3:2 esebimen jeńisti julyp alyp ketken edi. Sondaı-aq Qazaqstan kýbogynyń aqtyq synynda Pavlodardyń «Ertis» komandasymen bolǵan mańyzdy oıynda qarsylastar qaqpasyna jeńis dobyn soqqan osy Q. Nurdáýletov boldy.
